Napaypayso a Tulong Kadagiti Napanglaw
IDI adda ditoy daga ni Jesu-Kristo, ti Anak ti Dios, nangipakita iti pudno a pannakaseknan a tumulong kadagiti napanglaw. Maipapan iti ministerio ni Jesus, kinuna ti maysa a nakaimatang: “Dagiti bulsek makakitada manen, ket dagiti pilay magmagnada, dagiti agkukutel madaldalusanda ket dagiti tuleng makangkangngegda, ket dagiti natay maibangbangonda, ket dagiti napanglaw maidekdeklara kadakuada ti naimbag a damag.” (Mateo 11:5) Ngem komusta met dagiti minilmilion a napanglaw ita? Adda kadi aniaman a naimbag a damag agpaay kadakuada? Wen, adda mensahe ti namnama!
Nupay masansan a mabaybay-an dagiti napanglaw ken malipatan ida ti lubong, ikari ti Sao ti Dios, ti Biblia: “Saanto a kanayon a malipatan daydiay napanglaw, saanto met a pulos a mapukaw ti namnama dagidiay naemma.” (Salmo 9:18) Dagitoy a makaliwliwa a sasao matungpalto inton ti Pagarian ti Dios, maysa a pudno a nailangitan a gobierno, sukatanna dagiti amin a turay ti tao. (Daniel 2:44) Kas Ari dayta nailangitan a gobierno, ni Jesus “maasianto iti daydiay nanumo ken iti daydiay napanglaw, ket dagiti kararua dagidiay napanglaw isalakannanto. Iti pannakairurumen ken iti kinaranggas subbotennanto ti kararuada, ket ti darada napategto kadagiti matana.”—Salmo 72:13, 14.
Anianto ti kasasaad ti panagbiag inton iturayan ni Kristo ti daga? Dagidiay adda iti sidong ti sangalubongan a turay ni Kristo tagiragsakendanto dagiti bunga ti nagbannoganda. Kuna ti Biblia iti Mikias 4:3, 4: “Agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada; ta ti mismo a ngiwat ni Jehova ti buybuyot sinaona dayta.” Ti Pagarian ti Dios ikkatennanto pay dagiti parikut a panagsakit ken ipapatay. (Isaias 25:8) Anian a nagpaidumanto dayta a lubong! Mabalintayo a patien dagitoy a kari ti Biblia agsipud ta ti Dios a mismo ti nangipaltiing kadagitoy.
Malaksid iti panangipaayna iti mensahe ti namnama, tulongannatayo ti Biblia a mangtaming kadagiti inaldaw a parikut, kas iti panangparmek iti kinaawan panagraem iti bagi, a nalabit gapu iti kinapanglaw. Babaen ti panagadalna iti Biblia, ti maysa a nanumo a Kristiano ammona nga adda pategna iti imatang ti Dios, kas iti panangipateg ti Dios iti maysa a nabaknang a Kristiano. Ti libro ti Biblia a Job ibagana a ti Dios “saan a nangipaay iti ad-adu a konsiderasion iti daydiay natan-ok ngem iti daydiay nanumo, ta isuda amin aramid dagiti imana.” (Job 34:19) Agpada ti panagayat ti Dios kadakuada.—Aramid 10:34, 35.