“Umadanikayo iti Dios, ket Isu Umadaninto Kadakayo”
Sakbay ken Kalpasanna—No Kasano a Napagbalbaliw ti Biblia ti Maysa a Tao
MUSIKA ti kapatgan iti biag ni Rolf-Michael. Naadikto iti droga. Bayat ti kinaagtutubona idiay Alemania, nagbalin a managinum iti arak ken managusar iti LSD, cocaine, hashish, ken dadduma pay a droga a makaapekto iti isip.
Bayat ti panangikagumaanna a mangipuslit iti droga iti maysa a pagilian ti Africa, naaresto ni Rolf-Michael ket naibalud iti 13 a bulan. Dayta a pannakaibalud nangipaay kenkuana iti gundaway a mangusig iti pudno a panggep ti biag.
Ni Rolf-Michael ken ti asawana, a ni Ursula, inkagumaanda a sinapul ti kaipapanan ti biag ken sinukimatda ti kinapudno. Iti laksid dagiti di makaay-ayo a kapadasanda kadagiti makunkuna a Kristiano a relihion, addaanda iti nasged a tarigagay a mangam-ammo iti Dios. Ngem adda dagiti saludsodda a saan a makapnek a nasungbatan dagiti nagduduma a relihion. Kanayonanna, saan a nakaipaay dagitoy a relihion iti nabileg a pakatignayan tapno balbaliwanda ti panagbiagda.
Kamaudiananna, naam-ammo da Rolf-Michael ken ni Ursula dagiti Saksi ni Jehova. Idi agad-adaldan iti Biblia, natignay unay ni Rolf-Michael iti balakad nga: “Umadanikayo iti Dios, ket isu umadaninto kadakayo.” (Santiago 4:8) Nagbalin a determinado a ‘mangikkat iti daan a personalidad, a mayannurot iti sigud a dana ti kababalinna ken mangikawes iti baro a personalidad, a naparsua maitunos iti pagayatan ti Dios iti pudno a kinalinteg ken kinasungdo.’—Efeso 4:22-24.
Kasano a naikawes ni Rolf-Michael ti baro a personalidad? Naipakita kenkuana manipud iti Biblia a “babaen iti umiso a pannakaammo,” ti personalidad ti maysa a tao mabalin a ‘mapabaro maitunos iti ladawan Daydiay nangparsua iti dayta,’ awan sabali, ni Jehova a Dios.—Colosas 3:9-11.
Bayat ti pananggun-odna iti umiso a pannakaammo, inkagumaan ni Rolf-Michael nga itunos ti panagbiagna kadagiti prinsipio ti Sao ti Dios. (Juan 17:3) Narigat nga isardeng ti panagdroga, ngem nabigbig ni Rolf-Michael ti pateg ti iyaadani ken ni Jehova babaen ti kararag ken panagpatulong kenkuana. (1 Juan 5:14, 15) Nakagun-od iti kanayonan a tulong babaen ti nasinged a pannakilangenna kadagiti Saksi ni Jehova, a mangikagkagumaan a mangaramid iti pagayatan ti Dios.
Nakatulong met ken ni Rolf-Michael ti pannakaammo a ti lubong aglabas ket dagidiay mangar-aramid iti pagayatan ti Dios agtalinaedda nga agnanayon. Dayta ti nangpabileg kenkuana a mangpili, saan nga iti aglabas a ragragsak iti lubong, no di ket iti agnanayon a bendision nga iyeg ti nasinged a relasion iti naayat a Dios, ni Jehova. (1 Juan 2:15-17) Natukay unay ni Rolf-Michael kadagiti sasao ti Proverbio 27:11: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” Siyayaman a kunana: “Ipakita daytoy a bersikulo ti nasged a panagayat ni Jehova, yantangay mangipapaay kadagiti tattao iti gundaway a mangparagsak iti pusona.”
Kas ken ni Rolf-Michael, ti asawana ken dagiti tallo nga annakda, ginasut a ribu ti nagunggonaan iti panangsurot kadagiti prinsipio ti Biblia. Masarakan dagitoy nga indibidual kadagiti kongregasion dagiti Saksi ni Jehova iti intero a lubong. Makapaladingit ta iti dadduma a pagilian, sibibiddut a napabasol dagiti Saksi kas napeggad a sekta a namagsisina kadagiti pamilia. Ipakita ti kapadasan ni Rolf-Michael a saan a pudno dayta a pammabasol.—Hebreo 4:12.
Kuna ni Rolf-Michael a ti Mateo 6:33, a mangidagdagadag nga ipangpangrunatayo dagiti naespirituan a kalat, isu ti “kompas” ti pamiliana, a mangiwanwanwan kadakuada iti umiso a direksion. Da Rolf-Michael ken ti pamiliana kasta unay ti panagyamanda ken ni Jehova gapu iti naragsak a biag ti pamilia a tagtagiragsakenda kas Kristiano. Mariknada met ti sentimiento ti salmista a nangikanta: “Ania ti isupapakko ken Jehova gapu kadagiti amin a gunggonana kaniak?”—Salmo 116:12.
[Blurb iti panid 9]
Ti Dios mangipapaay kadagiti tattao iti gundaway a mangparagsak iti pusona
[Kahon iti panid]
Epektibo Dagiti Prinsipio ti Biblia
Dagitoy dagiti sumagmamano a prinsipio ti Biblia a nangtignay kadagiti adu a tattao a mangtallikud kadagiti makapapatay a pannakaadikto:
“O dakayo a managayat ken Jehova, guraenyo ti dakes.” (Salmo 97:10) Ti maysa a tao nalaklaka a maay-ayona ti Dios no makombinsir a dakes dagiti makapapatay nga ar-aramid ken no masukayna ti pudno a pananggura kadagita.
“Daydiay makipagna kadagiti masirib a tattao agbalinto a masirib, ngem daydiay addaan kadagiti pannakilangen kadagidiay maag nakadakdakesto ti pagtungpalanna.” (Proverbio 13:20) Tapno maisardengna ti agdroga ken dadduma pay a pannakaadikto, nasken a siaannad a pilien ti maysa a tao dagiti pakitimpuyoganna. Pudno a makagunggona ti makigayyem kadagiti Kristiano a tumulong kenkuana a mangisardeng iti bisio.
“Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” (Filipos 4:6, 7) Ti kasta a talna iti puso ken panunot ket saan a magun-odan iti sabali a pamay-an. Ket ti kasta a nainkararagan a panagpannuray iti Dios tulonganna ti maysa a mangsango kadagiti parikut iti biag a di agusar kadagiti makaadikto a droga.