Dagiti Kari a Mapangnamnamaan

NAPNO ti historia kadagiti di natungpal a kari. Dagiti nasion masansan a saanda a matungpal dagiti katulagan a saanda a rauten dagiti sabali a pagilian nupay pormal a pinirmaanda dagita. Nagbanag daytoy iti nakaam-amak a panaggugubat. Naminsan, kinuna ni Napoleon: “Sa la tungpalen dagiti gobierno dagiti karida no mapilitanda a mangaramid iti dayta, wenno no pagimbaganda dayta.”

Komusta met dagiti kari dagiti indibidual? Anian a makapaupay no ti maysa a tao saanna a tungpalen ti karina! Nangruna a kasta no am-ammo ken pagtaltalkanyo dayta a tao. Siempre, dagiti tattao mabalin a saanda a kabaelan wenno saanda a kayat a tungpalen dagiti karida.

Anian a naiduma unay dagiti kari ti tao kadagiti kari ti Dios! Naan-anay a mapagpannurayan ken mapagtalkan dagiti kari ti Dios. Mapangnamnamaan ti aniaman nga inkari ni Jehova a Dios. Sigurado a matungpal dayta. Maipapan iti di mapaay a sao ti Dios, kuna ti Isaias 55:11: “Kasta ti pagbalinanto ti saok a rummuar manipud iti ngiwatko. Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”

No kasta, ania ti rumbeng a panangmatmattayo kadagiti kari ti Dios a nailanad iti Biblia? Sigurado a makapagpannuraytayo kadagita. Kas pagarigan, insurat ni apostol Juan: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” (Apocalipsis 21:3, 4) Matagiragsakyo dagiti kasta a bendision no agtignaykayo a maitunos kadagiti sasao ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.