“Nakasarakak iti Gagayyem, Ayat, ken Atension”

“BABAEN iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Kas kinuna ni Jesus, ti ayat ti pakabigbigan ti Nakristianuan a panagkakabsat idi umuna a siglo. Iti surat ni Tertullian nasurok a sangagasut a tawen kalpasan ti ipapatay ni Kristo, inadawna ti kinuna dagiti agpalpaliiw: ‘Kitaenyo no kasano ti panagiinnayatda ken no kasano a nakasaganada pay a matay maigapu iti maysa ken maysa.’

Adda pay kadi ti kasta a kita ti ayat iti lubong? Adda. Usigenyo, kas pagarigan, ti maysa a surat a naawat ti sanga nga opisina dagiti Saksi ni Jehova idiay Brazil. Nagsurat ti maysa a babai nga agnagan Marília:

“Bayat ti panagindegmi idiay Villa Mercedes, Argentina, ni nanangko, a maysa kadagiti Saksi ni Jehova, nagsakit iti osteoarthritis, a nangparalisa kenkuana manipud siket nga agpababa. Iti umuna a walo a bulan ti panagsakitna, dagiti Saksi idiay Villa Mercedes ti siaayat ken siaanus a nangaywan kenkuana. Isuda ti nangasikaso kadagiti amin a banag, panagdalus iti balayna ken panangisagana iti taraonna. Uray bayat ti kaaddana iti ospital, adda a kanayon ti kadua ni Nanang, iti aldaw ken rabii.

“Nagsublikamin ditoy Brazil, ket agtultuloy ti panagpaimbag ni Nanang. Dagiti kaarrubami ita a Saksi ar-aramidenda ti amin a kabaelanda a tumulong iti panagpaimbag ni Nanang.”

Inngudo ni Marília iti suratna: “Aminek a saanak a Saksi, ngem nakasarakak iti gagayyem, ayat, ken atension kadagiti Saksi.”

Wen, adda pay laeng dagiti tattao a mangipakpakita iti pudno a Nakristianuan nga ayat. Iti panangaramidda iti dayta, ipakpakitada no kasano a makaimpluensia iti biagtayo dagiti sursuro ni Jesus.