‘Saan nga Agnaed ti Dios Kadagiti Templo nga Inaramid ti Ima’
DI PAGDUADUAAN a pamiliar ni apostol Pablo kadagiti templo ni Athena, yantangay makita dagitoy iti adu a siudad a binisitana bayat ti panagmisionerona. Sigun iti The Encyclopædia Britannica, ni Athena ket natan-ok a diosa saan laeng nga iti gubat ken sirib no di pay ket “kadagiti paglaingan ken kaaduan a nasigo a trabaho bayat ti panawen ti talna.”
Ti kalatakan a templo ni Athena isu ti Parthenon, a naibangon idiay Atenas, ti siudad a naipanagan iti diosa. Maibilang ti Parthenon a kas maysa kadagiti katan-okan a templo ti nagkauna a lubong, a pakasarakan iti 12 a metro nga estatua ni Athena a naaramid iti balitok ken marfil. Idi bimmisita ni Pablo idiay Atenas, daytoy a puraw a marmol a templo ti maibilang a kalatakan a pakabigbigan ti siudad iti agarup 500 a tawenen.
Iti asideg ti Parthenon, nangasaba ni Pablo iti maysa a grupo dagiti taga Atenas maipapan iti Dios a “saan nga agnaed kadagiti templo nga inaramid ti ima.” (Aramid 17:23, 24) Kadagiti dadduma nga agdengdengngeg ken ni Pablo, nalabit nga ad-adda a magustuanda ti kinaranga dagiti templo ni Athena wenno ti kinadayag dagiti imahenna ngem iti di makita a Dios a dida am-ammo. Ngem kas iti impaganetget ni Pablo, saan a rumbeng a panunoten a ti Namarsua iti tao ket “umasping iti balitok wenno pirak wenno bato, nga umasping iti maysa a banag a naikitikit babaen . . . ti tao.”—Aramid 17:29.
Awan ti nataginayon kadagiti dios ken diosa a kas ken ni Athena—a nadayag laeng gapu kadagiti templo ken estatua. Awanen ti estatua ni Athena idiay Parthenon idi maikalima a siglo K.P., ket ti laeng nabatbati isu dagiti rebba ti sumagmamano kadagiti templona. Siasino pay ita ti agpannuray iti sirib ken panangiwanwan ni Athena?
Anian a naiduma ni Jehova, “ti agnanayon a Dios” a di nakita ti asinoman a tao. (Roma 16:26; 1 Juan 4:12) Insurat dagiti annak ni Kore: “Daytoy a Dios isu ti Diostayo agingga iti tiempo a di nakedngan, iti mismo nga agnanayon. Isu ibagnosnatayto.” (Salmo 48:14) Ti maysa a pamay-an tapno matagiragsak ti panangiwanwan ni Jehova a Dios ket babaen ti panangadal iti Saona, ti Biblia, ken panangyaplikar kadagiti balakadna.