Pinabilegnaka Kadi ti Sao ti Dios?
NO ADDA problema, kasano a risutem dayta? Iti kapadasan ni Jesus, ti pananglagip kadagiti maitutop a kasuratan ket nakatulong kenkuana a nangsaranget kadagiti pannulisog ni Satanas. (Mateo 4:1-11) Kasta met, idi naipasango ni Ari David kadagiti personal a pakasuotan, napabileg babaen ti Sao ti Dios. Kinunana: “Idi a ti mangrirriribuk a pampanunotko immaduda iti unegko, dagiti bukodmo a pangliwliwa rinugianda a sappuyoten ti kararuak.”—Salmo 94:19.
Umasping iti dayta, no adda pakasuotantayo, maliwliwa wenno mapabilegtayo no lagipentayo ti maysa a paboritotayo a teksto. Kas pagarigan, ni Rex, nga agtawen itan iti 89, ket maysa nga amin-tiempo a managebanghelio sipud idi 1931. Kaskasdi, kinunana: “Masansan a kasla diak kabaelan nga itungpal ti maitalek kaniak a naisangsangayan nga annongen iti ministerio.” Kasano a napagballigianna dayta? “Linagipko ti paboritok a teksto, ti Proverbio 3:5, nga agkuna: ‘Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat.’ Ti pananglagip ken panangyaplikar iti daytoy a teksto tinulongannak a mangitungpal a sibaballigi iti annongek.”
Makatulong met kadagiti agtutubo no adda maysa a paboritoda a teksto. Ti agtawen iti innem a ni Jack kunana a ti Mateo 24:14 ti paboritona a teksto. Daytoy a teksto ti nangtignay kenkuana a mangasaba a kaduana dagiti dadakkelna. Kunana: “Pagaayatko ti mangasaba kada Sabado a kaduak ni nanang, tatang, ken manangko.”
Kas ken ni Jesus, direkta kadi a masuot ti pammatim no dadduma? Mabalinmo nga aramiden a maysa kadagiti paboritom a teksto ti Filipos 4:13. Kas ken ni Ari David, agsagsagabaka kadi iti ‘makariribuk a pampanunot’? Mabalin a mapagballigiam dayta no lagipem ti Filipos 4:6, 7. Maringgoranka kadi gapu ta saan a nabunga ti panagserbim iti Dios? Mapabilegka no lagipem ti 1 Corinto 15:58.
Babaen ti panangikabesa iti maitutop a teksto, ipalpalubostayo nga impluensiaannatayo ti Sao ti Dios. (Hebreo 4:12) Mabalin nga agpada a makapabileg ken makaliwliwa kadatayo dagiti kasta a pagaayat a teksto.—Roma 15:4.