Panagaramid iti Naimbag iti Panawen ti Pakarigatan
“ARAMIDENTAYO koma ti naimbag kadagiti amin,” indagadag ni apostol Pablo, “ngem nangnangruna kadagidiay nainaig kadatayo iti pammati.” (Galacia 6:10) Dagiti Saksi ni Jehova iti sangalubongan siaanep nga agbibiagda maitunos iti dayta a prinsipio, nga agaramidda iti naimbag kadagiti isuamin, nangruna dagiti kapammatianda. Adu a daras a napaneknekan dayta bayat ti panawen ti pakarigatan. Usigentayo ti nabiit pay a pagarigan manipud iti tallo a pagilian.
Idi Disiembre 2002, ti Guam ket dinidigra ti maysa a nadawel a bagyo nga addaan iti 300 a kilometro kada oras a kapegges ti angin. Adu ti narakrak a pagtaengan, dadduma ti naan-anay a nadadael. Dagiti kongregasion iti dayta a lugar dagus a nangorganisarda iti grupo dagiti kakabsat a timmulong kadagiti pamilia a Saksi a nakaro a naapektaran. Ti sanga nga opisina idiay Guam nangipatulodda kadagiti materiales ken kakabsat a mangtarimaan kadagiti nadadael a balay, ken timmulong met ti sanga nga opisina idiay Hawaii. Iti uneg ti sumagmamano a lawas, maysa a bunggoy dagiti karpintero ti simmangpet manipud Hawaii tapno tumulong iti trabaho a panagibangon, ket addada lumugar a kakabsat a nagbakasion iti panggedan tapno tumulong kadakuada. Ti naragsak a panagtitinnulong ket maysa a panangsaksi kadagiti amin a tattao iti komunidad.
Iti adayo a paset ti siudad ti Mandalay, Myanmar, adda uram a napasamak iti asideg ti maysa a Kingdom Hall. Asideg met iti dayta ti balay ti maysa a di aktibo a kabsat a babai ken ti pamiliana. Agngangabit a danonen ti apuy ti balayna gapu iti direksion ti angin, isu a napan nagpaarayat iti Kingdom Hall. Madama idi a matartarimaan ti Kingdom Hall isu nga adu ti kakabsat a nadanonna. Nasdaaw dagiti kakabsat a makakita kenkuana agsipud ta dida ammo nga iti dayta a lugar ti pagnanaedanna. Dagus a timmulong dagiti kakabsat iti panangyakar kadagiti sanikua ti pamilia tapno saan a mauram. Idi nangngeg ti saan a Saksi nga asawana ti maipapan iti uram, dagus a nagawid ket nadanonanna dagiti kakabsat a mangar-arayat iti pamiliana. Naragsakan ken agyamyaman ti asawa. Nabang-aran met ta nasalaknibanda manipud kadagiti mannanakaw a manggunggundaway kadagiti kasta a situasion. Dayta nga ebkas ti kinamanangngaasi dagiti kakabsat ti nangtignay iti daytoy a kabsat ken iti anakna a makitimpuyog manen iti kongregasion Kristiano, ket regularda itan a makigimgimong.
Bayat ti naglabas a tawen serbisio, nagraira ti bisin idiay Mozambique kas resulta ti nakaro a gawat. Dagus a nagtignay ti sanga nga opisina dagiti Saksi ni Jehova sadiay babaen ti panangibunongda iti taraon kadagiti agkasapulan. Naaramid dayta kadagiti Kingdom Hall, no dadduma kalpasan dagiti gimong ti kongregasion. Maysa a kabsat nga agsolsolo nga ina ti nagkuna: “Malmaldaanganak a napan nakigimong, a diak ammo no ania ti ipakanko kadagiti annakko inton agawidkami.” Ti naayat a tulong dagiti kakabsat ti dagus a nangpakired kenkuana. “Kaslaak napagungar!” kinunana.
Dagiti Saksi ‘nagaramidda met iti naimbag’ iti naespirituan a pamay-an babaen ti panangiranudda iti makaliwliwa ken mangted-namnama a mensahe ti Biblia. Mamatida iti kinuna ti masirib a lalaki idi un-unana: “No maipapan iti daydiay umim-imdeng kaniak, agtaengto iti kinatalged ket saanto a masinga manipud alinggaget ti didigra.”—Proverbio 1:33.
[Dagiti Ladawan iti panid 31]
1, 2. Panangibunong iti taraon kadagiti agkasapulan idiay Mozambique
3, 4. Nadadael ti adu a balay idiay Guam gapu iti bagyo
[Credit Lines]
Ubing, iti kannigid: Andrea Booher/FEMA News Photo; babai, iti ngato: AP Photo/Pacific Daily News, Masako Watanabe