“Isu Dayta ti Kasayaatan a Maaramidmo”

NI Alexis, idiay siudad ti Morelia, Mexico, ket maysa nga ubing a lalaki nga agtawen iti lima. Makipagad-adal iti Biblia dagiti dadakkelna ken tumabtabunoda kadagiti gimong dagiti Saksi ni Jehova. Bayat ti kaaddada iti asamblea sirkito a sangapamiliaan, naimatanganna ti maysa a demostrasion maipapan iti panangasaba iti binalaybalay. Dagus nga inyimtuodna ken iti amana, “Tatang, Tatang, apay a dika mangasaba?” Insungbat ti ama, “madamaak pay la ngamin nga agad-adal tapno maaramidko dayta.” Sigagagar nga insungbat ni Alexis, “Tatang, isu dayta ti kasayaatan a maaramidmo.”

Nakita daytoy nga ubing a kasapulan ti panagtignay maitunos iti pannakaammona ken ni Jehova. Yantangay addada ubbing a kasinsinna nga agnanaed iti isu met laeng a balay a pagnanaedanna, nagkararag nga umuna ken ni Jehova sa insaritana kadakuada ti naadalna kadagiti dadakkelna manipud iti libro a Ti Librok Dagiti Estoria ti Biblia. Nupay saan pay a makabasa ni Alexis, kabesadona ti linaon ti libro babaen dagiti ladawan a mangyilustrar kadagiti estoria. Kinunana pay a kayatna a sarungkaran dagiti tattao kadagiti pagtaenganda tapno iranud kadakuada ti maad-adalna maipapan kadagiti panggep ti Dios.

Kinapudnona, dagiti agtutubo ken adulto mabalinda nga itunos ti biagda iti namnamaen kadakuada ni Jehova, “daydiay Santo,” ket iti kasta, matagiragsakda ti katan-okan a pribilehio a mangsaksi maipapan kenkuana kadagiti nasnasion. (Isaias 43:3; Mateo 21:16) Awan duadua a dayta ti maysa kadagiti kasayaatan a banag a maaramidan ti maysa a tao.