Matagiragsaktayto Ngata ti Pudno a Kinatalged?
UBBING a siraragsak nga agaayam a kadua dagiti nagannakda—siasino ti saan a maragsakan iti kasta a buya? Marikna dagiti annak a naan-anay a natalgedda iti sidong dagiti naayat a nagannak. Ngem kadagiti adu nga agtutubo, manmano dagiti kasta a kanito ti kinaragsak. Adda dagiti ubbing a dida ammo no sadino ti pagturoganda iti rabii. Adda kadi aniaman a namnama agpaay kadagiti ubbing nga awanan iti pagtaengan ken kadagiti dadduma a saan a natalged ti biagda?
Nupay agparang a nalidem ti masanguanan, mangyeg iti namnama ti Sao ti Dios. Impadto ni propeta Isaias nga addanto tiempo a naan-anay a natalged dagiti tattao. Insuratna: “Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan.”—Isaias 65:21, 22.
Ngem adda kadi natalged a nakaibatayan dayta a namnama? Pudno a ti sao a “namnama” saanna a kanayon nga ipasimudaag ti kinasigurado. Kas pagarigan, idiay Brazil, masansan a mangngegan ti ebkas nga: “A esperança é a última que morre” wenno literal a kaipapananna, “Ti namnama isu ti kaudian a banag a matay.” Ipamatmatna dayta nga adu a tattao ti agtultuloy a mangnamnama uray no awan ti natalged a nakaibatayan ti namnama. Nupay kasta, naiduma ti namnama nga ididiaya kadatayo ti sibibiag a Dios. Insurat ni apostol Pablo: “Awan asinoman a mangisaad iti pammatina [iti Dios] ti maupayto.” (Roma 10:11) Dagiti padto iti Biblia a natungpalen ipaayandatayo kadagiti rason tapno agtalek a pumayso dagiti amin a dadduma pay a kari ni Jehova a Dios. No pumaysonto dagita a kari, awanton dagiti kasasaad a mangpilit kadagiti ubbing nga agnaed kadagiti kalsada.
Uray ita, ti praktikal a balakad a masarakan iti Biblia matulonganna dagidiay awanan iti namnama tapno mapasayaatda ti biagda ken maaddaanda iti pudno a kinatalged. Kasano a posible dayta? Dagiti Saksi ni Jehova iti komunidadyo maragsakanda a tumulong kadatayo a mangsapul iti sungbat dayta a saludsod.