Il-iliwenyo Kadi ti Lubong nga Awan ti Buteng?

“Agbibiagtayo iti ‘agtultuloy a makapadanag a kinaalerto ken . . . kinaawan gaway,’ a maigapu iti ‘di unay mailawlawag . . . a peggad a mabalin a mangyeg iti aniaman a pakadidigraan iti aniaman nga oras.’”

DAGITOY a sasao, a naadaw idi napalabas a tawen iti magasin a Newsweek, iyanninawna ti rikna ti adu a tattao nga agbibiag iti nariribuk ita a lubong. Impasimudaag ni Jesu-Kristo nga umirteng dagiti kasta a rikna iti asideg a masanguanan. Impakpakaunana a kastanto unay ti pannakariribuk dagiti nasion a saanda nga ammo ti aramidenda ken dagiti tattao matalimudawda gapu kadagiti banag a pagbutbutnganda a mapasamak iti daga. Ngem saantayo koma nga agbuteng wenno makarikna iti kinaawan gaway, agsipud ta innayon ni Jesus: “Bayat a mangrugi a mapasamak dagitoy a banag, tumakderkayo a sililinteg ket itangadyo dagiti uloyo, agsipud ta ti pannakaispalyo umas-asidegen.”​—Lucas 21:25-28.

Iti panangdeskribirna iti kasasaad ti ilina ditoy daga kalpasan dayta a panangispal, impakaammo ni Jehova a Dios: “Ti ilik agnaedto iti natalna a disso a pagyanan ken kadagiti pagtaengan ti naan-anay a panagtalek ken kadagiti di masingsinga a lugar a paginanaan.” (Isaias 32:18) Babaen ken ni propeta Mikias, kinuna ni Jehova: “Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada.”​—Mikias 4:4.

Anian a naiduma dayta iti agdama a biag! Awanto ti di mapakpakadaan a peggad a mangipangta iti sangatauan. Imbes nga agtultuloy ti makapadanag a panagsiput ken kinaawan gaway, agnanayonto ti kinatalna ken kinaragsak.