Siasino ti Mangtaraon iti Lubong?
SIGUN iti pattapatta ti World Food Programme, maysa nga ahensia ti United Nations a tumultulong kadagiti mabisbisin, agngangabit nga agsagaba iti bisin ti 800 milion a tattao—nga adu kadakuada ti ubbing. Nabiit pay a kinuna dayta nga ahensia a dagiti pinansial ken atension a mabalin koma a naitulong ti adu a nabaknang a pagilian iti daytoy a situasion ket kangrunaanna a nausar kadagiti dadduma a parikut, kas iti terorismo. Dimmegdeg ti parikut gapu iti panagsaknap dagiti makaakar a sakit. Maipapan kadagiti pagilian ti Africa a nasaknap ti AIDS, kinuna ti Global School Feeding Report ti ahensia: “Maib-ibus ti intero a kaputotan a nagannak. Dagiti annak a napanawanda masansan a biagenda a bukbukod ti bagida, a kaadduan kadakuada ti saan a nasursuruan no kasano ti agtalon ken no kasano ti agbiag, a gagangay nga isuro dagiti nagannak kadagiti annakda.”
Ti World Food Programme itantandudona ti gannuatna a panangpakan iti maminsan kada aldaw kadagiti ubbing kadagiti eskuelaan. Ti panggep ket saan laeng a tapno maksayan ti parikut iti panagbisin no di ket tapno maisayangkat met ti dadduma a programa a nadisenio a manglapped iti HIV/AIDS kadagiti agtutubo babaen ti regular nga edukasion.
Kadagiti lugar a nakaaramidan ti programa, naikkan dagiti ubbing iti taraon, pannakasanay mainaig iti personal a kinadalus, ken dadduma pay a tulong. Napaliiw pay nga iti lugar nga adda panagbalbaliw iti kababalin dagiti tattao, bimmaba dagiti kaso ti pannakayakar ti HIV/AIDS.
Makapaladingit ta masansan a kurang ken saan a sigurado dagiti resulta ti panagregget dagiti tattao. Ngem adda makaliwliwa a kari ti Biblia mainaig iti permanente a solusion ti parikut iti panagbisin. “Maaddanto ti naruay a bukbukel iti daga,” kuna ti Salmo 72:16. Iti sidong ti Pagarian ti Dios, maibaganto dagiti tattao ken ni Jehova a Dios: “Inturongmo ti asikasom iti daga, tapno maipaayam iti naruay . . . Isaganam ti bukbukelda, ta kasta ti panangisaganam iti daga.”—Salmo 65:9.
[Picture Credit Line iti panid 32]
WFP/Y. Yuge