Napakumbaba nga Africano a Mangipatpateg iti Sao ti Dios
MASANSAN a masorpresa dagiti bisita iti Africa no maammuanda a naglaka nga irugi ti pannakipatang kadagiti lumugar mainaig kadagiti topiko ti Biblia. Maguyugoyda nga umimdeng no maisarita kadakuada dagiti saludsod a kas iti, “Ania ti Pagarian ti Dios?” wenno “Adda kadi ti manayon a solusion dagiti parikut kas iti kinakirang ti taraon, sakit, gubat, ken krimen?” Adu ti maragsakan no adda ganggannaet a mangipakita kadakuada kadagiti sungbat manipud iti Biblia. Masansan a mangitunda dayta iti regular a panagadal iti Biblia. Ken bayat a rumangrang-ay iti naespirituan ti estudiante, agbalinda a bautisado a Kristiano.
Iti Aramid 8:26-40, dakamaten ti Biblia ti maysa kadagiti kaunaan nga Africano a nagtignay iti kasta a pamay-an. Isu ti Etiope a lalaki a nagdaliasat nga agturong idiay Jerusalem tapno agdayaw iti pudno a Dios, ni Jehova.
Kas ipakita ti ladawan iti baba, nakakaruahe ti Etiope iti panagawidna, ket basbasaenna ti maysa a lukot. Immasideg ken nagimtuod kenkuana ti maysa a ganggannaet: “Ammom kadi nga agpayso no ania ti basbasaem?” Sipapakumbaba a binigbig ti Etiope a kasapulanna ti tulong ket kiniddawna nga agsakay iti karuahena ti ganggannaet a ni Felipe, maysa a Kristiano nga ebanghelisador. Kalpasanna, kiniddawna ken ni Felipe nga ilawlawagna ti kaipapanan ti kabasbasana a paset ti Kasuratan. Inlawlawag ni Felipe a maysa dayta a padto a mangipatpatuldo iti nabiit pay nga ipapatay ti Mesias, ni Jesu-Kristo. Insalaysay ni Felipe dagiti sabali pay a banag mainaig iti “naimbag a damag maipapan ken Jesus,” nga awan duadua a pakairamanan ti panagungar ni Jesus.
Gapu ta nangngegna dagitoy a nakaskasdaaw a kinapudno, tinarigagayan ti Etiope ti agbalin nga adalan ni Jesus ket inyimtuodna: “Ania ti makalapped kaniak a mabautisaran?” Kalpasan a nabautisaran, siraragsak a nagawid daytoy a napakumbaba nga Africano, ket awanen ti kanayonan a dinakamat ti Biblia maipapan kenkuana.
Ita, tultulongan dagiti Saksi ni Jehova ti minilion a tattao iti sangalubongan tapno maadalda ti maipapan iti isu met laeng a “naimbag a damag.” Agarup innem a milion a libre a panagadal iti Biblia ti maikonkondukta ita.