Ti Panangsapul iti Talna ti Panunot

NI Albert ket maysa a naragsak nga asawa ken ama ti dua a nakaay-ayat nga annak. Ngem mariknana nga adda kurang iti biagna. Adda panawen idi a marigatan nga agsapul iti panggedan, ket nakiraman iti politika ken nangitandudo iti ideolohia. Nagbalin pay nga aktibo a miembro ti lokal a partido Komunista.

Ngem di nagbayag, nadismaya ni Albert iti Komunismo. Insardengna ti makipaset iti politika ket impamaysana ti atensionna iti pamiliana. Nagbalin a kalatna a masigurado a naragsak ti pamiliana. Kaskasdi, marikna latta ni Albert nga adda kurang; awanan latta iti pudno a talna ti panunot.

Adu ti makapaspasar met iti narikna ni Albert. Tapno makasarakda iti makapnek a panggep iti biag, minilion ti nangusig iti nadumaduma nga ideolohia, pilosopia, ken relihion. Iti Lumaud, nagtignay dagiti hippie idi dekada 1960 maibusor kadagiti nainkasigudan a moral ken sosial a prinsipio. Dagiti agtutubo kangrunaanna sinapulda ti kinaragsak ken ti kaipapanan ti biag babaen kadagiti droga a makaapekto iti isip ken babaen kadagiti pilosopia nga insuro dagiti makunkuna a guru ken nangangato a padi. Nupay kasta, ti organisasion dagiti hippie ket napaay a mangyeg iti pudno a kinaragsak. Imbes ketdi, namataudda kadagiti adikto iti droga ken nalulok nga agtutubo, a nangpadakes iti moral ti kagimongan.

Iti sinigsiglo, adu ti nangsapul iti kinaragsak babaen ti kinabaknang, pannakabalin, wenno edukasion. Ti panangsapul kadagita ket nagresulta iti pannakapaay. “Uray no addaan kinaruay ti maysa a tao,” kinuna ni Jesus, “ti biagna saan nga agtaud iti bambanag nga ik-ikutanna.” (Lucas 12:15) Imbes ketdi, ti determinado a panagpabaknang masansan a mangyeg iti ladingit. Kuna ti Biblia: “Dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba. Ta ti ayat iti kuarta isu ti ramut dagiti amin a kita ti makadangran a bambanag, ket babaen ti panangragpat iti daytoy nga ayat . . . ti sumagmamano . . . sinalputda ti intero a bagbagida iti adu nga ut-ot.”​—1 Timoteo 6:9, 10.

Kasano ngarud a ti maysa maaddaan iti talna ti panunot ken panggep iti biag? Nasken pay kadi ti panangpadpadas, a kasla agpana iti maysa a narigat a puntiria iti kasipngetan? Makaparagsak ta saan. Kas makitatayo iti sumaganad nga artikulo, ti solusion ket agpannuray iti panangpennek iti kapatgan ken, iti kinapudnona, naisangsangayan a kasapulan ti tao.

[Ladawan iti panid 3]

Ti kadi pananggun-od iti kinabaknang, pannakabalin, wenno edukasion ti mangyeg kadakayo iti talna ti panunot?