Naapresiar ti Panangipategna iti Biblia

NI Marianna, maysa kadagiti Saksi ni Jehova iti abagatan ti Italia, ket agtawen iti 18 ken maudi a tawennan iti haiskul. Adda dagiti kaeskuelaanna nga agtutubo a Saksi.

“Iti sumagmamano a tawenen,” insurat ni Marianna, “dadduma kadakami ti mangbasbasa iti teksto ti Biblia iti inaldaw manipud iti Panangsukimat Kadagiti Kasuratan iti Inaldaw bayat ti tiempo ti panagmerienda. Ti laeng mabalinmi a pangaramidan iti dayta ket iti dalan nga asideg ti siled dagiti mannursuro. Saan unay a naulimek iti dayta a lugar. Makitadakami ti kaaduan kadagiti mannursuro no lumabasda, ket sumardeng ti dadduma tapno kitaenda no ania ti ar-aramidenmi. Daytoy ti masansan a mangipaay kadakami iti gundaway a mangsungbat kadagiti saludsodda. Kaaduanna, maysa a mannursuro ti makisarita kadakami iti kada aldaw. Adda dagiti nagdengngeg iti panangusigmi iti teksto ti Biblia ken nangyebkas iti apresasionda kadakami a Saksi gapu iti panangipategmi kadagiti naespirituan a banag. Naminsan, inawisnakami ti sumegunda iti prinsipal tapno aramidenmi ti panagsasaritami iti opisina dagiti mannursuro.

“Idi nakita ti mannursuromi a di maitutop ti lugar a pangus-usiganmi iti kasuratan, kiniddawna iti prinsipal no mabalinmi nga aramiden dayta iti maysa kadagiti siled tapno nataltalna. Impalubos ti prinsipal, ket ti mannursurok pinadayawannakami iti sango ti intero a klase gapu iti nasayaat nga ulidan nga ipakpakitami. Naragsakkami amin gapu iti naindaklan a pribilehio nga inted kadakami ni Jehova.”