‘Ti Ayatyo Amin Rumangrang-ay’
NAPASARAN ti Japan ti adu a natural a didigra idi 2004, a pakairamanan dagiti bagyo, layus, ken ginggined. Nakaro a naapektaran ti biag ti adu, agraman dagiti Saksi ni Jehova. (Eclesiastes 9:11) Ngem gapu kadagitoy a pakarigatan, naaddaan dagiti Saksi iti gundaway a mangipakita iti panagayatda kadagiti kakabsatda.―1 Pedro 1:22.
Kas pagarigan, gapu kadagiti napigsa a tudo iti Hulio, ngimmato ti danum iti maysa a karayan iti sentro ti Japan. Nasurok a 20 a pagtaengan dagiti Saksi ni Jehova ti dinadael ti layus. Iti maysa a Kingdom Hall, ngimmato ti danum iti agarup maysa a metro manipud iti suelo. Dagus nga immarayat dagiti Saksi manipud kadagiti kabangibang a kongregasion. Ginasut a boluntario ti nangdalus kadagiti pitakpitak a pagtaengan. Naan-anay a nadalusan ken natarimaan ti Kingdom Hall iti uneg laeng ti dua a lawas.
Idi Oktubre 23, maysa a ginggined nga addaan iti kapigsa a 6.8 iti Richter scale ti nangkintayeg iti dayta met laeng a lugar. Di kumurang nga 40 ti natay, ken nasurok a 100,000 a tattao ti napagbakuit manipud kadagiti pagtaenganda. Nagsardeng ti suplay ti danum, gas, ken koriente. Nupay ti sentro ti ginggined ket 50 kilometro laeng ti kaadayona, saan a nadadael ti katartarimaan a Kingdom Hall. Nagserbi dayta a temporario a pasilidad ti saranay. Dagus a sinukimat dagiti Kristiano a panglakayen no natalged met laeng ti kasasaad dagiti kapammatianda ket nabang-aranda idi naammuanda nga awan ti nasaktan wenno natay. Kabigatanna iti agsapa, innem a Saksi a biktima iti daydi a panaglayus iti Hulio ti sigagagar a nagboluntario tapno mangidanon kadagiti taraon ken danum kadagiti naapektaran a lugar. Sumagmamano laeng nga oras kalpasan dayta a ginggined, dimteng dagiti mausar a pangsaranay.
“Dagidiay nagbalin a biktima ti layus imbilangda ti panangsaranay kadagidiay naapektaran iti ginggined kas maysa a gundaway tapno mayebkasda ti panangapresiarda iti tulong nga inawatda met idi,” insalaysay ti maysa a manangaywan. “Impapatida ti nagtrabaho manipud parbangon agingga iti rabrabii. Kaskasdi a nakaragragsak dagiti rupada!”
Awan ti layus wenno ginggined a mabalin a mangguped iti singgalut ti ayat a mangrepreppet iti Nakristianuan a panagkakabsat dagiti Saksi ni Jehova. Imbes ketdi, no dumteng dagiti kasta a didigra, mapasaran dagiti Kristiano ti kinuna ni apostol Pablo kadagiti kapammatian idiay Tesalonica: “Ti ayat ti tunggal maysa ken dakayo amin rumangrang-ay maipaay iti maysa ken maysa.”—2 Tesalonica 1:3.