Panangtulong Kadagiti Tsino Idiay Mexico

“SANGAPULO a lallaki manipud kadagiti amin a pagsasao ti nasnasion kumpetdanto, wen, pudno a kumpetdanto iti pandiling ti maysa a lalaki a Judio, a kunkunada: ‘Kumuyogkaminto kadakayo, ta nangngegmi a ti Dios adda kadakayo.’” (Zacarias 8:23) Ita, matungtungpal daytoy a nakapimpintas a padto iti intero a lubong. Dagiti tattao “manipud kadagiti amin a pagsasao ti nasnasion” kimmuyogda kadagiti naespirituan nga Israelita tapno agdayawda met ken ni Jehova a Dios. Interesado unay dagiti Saksi ni Jehova iti kaitungpalan daytoy a padto. Adu kadakuada ti agad-adal iti sabali a pagsasao tapno makiramanda iti sangalubongan a trabaho a panangasaba.

Kasta ti ar-aramiden dagiti Saksi ni Jehova idiay Mexico. Mapattapatta nga adda 30,000 a Tsino ti pagsasaoda nga agnanaed idiay Mexico. Idi 2003, adda 15 kadakuada a timmabuno iti Pananglaglagip iti ipapatay ni Kristo a naangay idiay Mexico City. Gapuna, nabigbig dagiti Saksi idiay Mexico nga adda potensial a naespirituan a panagrang-ay kadagiti Tsino nga agnanaed sadiay. Tapno ad-adu pay ti makatulong kadagitoy a Tsino, naipasdek ti maysa a kurso nga agpaut iti tallo a bulan tapno mangisuro kadagiti Mexicano a Saksi no kasano ti simple a mangasaba iti Mandarin a pagsasao. Adda 25 a Saksi a nagadal iti dayta a kurso. Iti panagturposda, maysa nga opisial manipud iti maysa a komunidad idiay Mexico a Mandarin ti pagsasaoda ti timmabuno iti dayta a panaggraduar, a mangipakita iti dakkel nga epekto dayta a klase kadagiti umili a Tsino. Maysa a lokal nga institusion dagiti Tsino ti nangitukon iti scholarship kadagiti tallo nga estudiante a mapan iti ballasiw-taaw tapno ad-adda a maasa ti kinalaingda nga agsao iti Tsino.

Ti kurso ket naglaon iti praktikal a panagsanay. Kalpasan a naadal dagiti estudiante ti sumagmamano a simple nga ebkas, dagus a nangasabada iti Tsino kadagiti lugar ti negosio iti Mexico City. Dagiti nareregta nga estudiante nakairugida iti 21 a panagadal iti Biblia. Dakkel ti naitulong ti broshur nga Ania ti Kalikaguman ti Dios Kadatayo? iti Tsino ngem naisurat iti Romano nga alpabeto, a maawagan Pinyin.

Kasano ti pamay-an dagiti estudiante a mangyadal iti Biblia idinto ta karugrugida iti kurso a panagadal iti Tsino? Idi damo, ti maibagada laeng ket, “Qing Du [Basaenyo man]” sada itudo ti parapo kalpasanna ti saludsod. Kalpasan ti panagbasa ken isusungbat ti tao iti Tsino a pagsasao, ibagada, “Shei shei [Pagyamanan]” ken “Hen Hao [Nagsayaat].”

Nairugi ti kasta a panagadal iti Biblia iti maysa a babai nga agkuna nga isu ket Kristiano. Kalpasan ti maikatlo a panagadal, pampanunoten ti Saksi no naawatan met laeng ti babai ti impormasion. Gapuna, nangikuyog ti Saksi iti maysa a kabsat a Tsino ti talaga a lenguahena. Idi inyimtuodna iti babai no adda aniaman a saludsodna, nagimtuod ti babai: “Tapno mabautisaranak, masapul kadi nga ammok ti aglangoy?”

Di nagbayag, naipasdek ti maysa a Panagadal ti Kongregasion iti Libro a tabtabunuan ti agarup 9 a Tsino ken 23 a lumugar a Mexicano a Saksi. Maysa kadagiti tumabtabuno ket Tsino a doktor, a nakaawat kadagiti Espaniol a magasin a Pagwanawanan ken Agriingkayo! manipud iti maysa kadagiti pasientena. Gapu ta saan a makabasa iti Espaniol, adda kiniddawna a mangipatarus iti sumagmamano a sasao para kenkuana. Idi madlawna a maipapan iti Biblia dagita a magasin, dinamagna iti pasiente no mabalinna a magun-od ti magasin iti Tsino. Kasta ti inaramid ti pasiente ket babaen ti sanga nga opisina dagiti Saksi ni Jehova idiay Mexico, nayurnos ti panangbisita kenkuana ti maysa a Saksi a makapagsao iti Tsino. Adda Biblia ti nanang ti doktor nga agnanaed idiay China, ket kaay-ayo ti doktor a basaen dayta. Idi inkeddengna ti mapan idiay Mexico, imbaga ni nanangna a masapul nga itultuloyna ti panagbasana iti Biblia. Gapuna, inkarkararag ti doktor nga adda koma tumulong kenkuana nga agadal iti ad-adu pay maipapan iti Dios a tuktukoyen ti Biblia. Kinuna ti doktor: “Impangag ti Dios ti kararagko!”

Tumabtabuno met iti dayta a panagadal iti libro ti maysa a Tsino a pamilia nga agab-abang iti balay ti maysa a Mexicana a makipagad-adal iti Biblia kadagiti Saksi ni Jehova. Nupay bassit laeng nga Espaniol ti ammo dayta a Tsino a pamilia, tumabunoda latta iti dayta a panagadal iti Biblia. Idi agangay, dinamag dayta a pamilia iti Saksi a mangikonkondukta iti panagadal no isu ket addaan iti aniaman a publikasion iti Tsino. Di nagbayag, nangrugi a mayadalanda iti Biblia iti Tsino. Kas resultana, inyebkas ti pamilia ti tarigagayda a mangasaba kadagiti kailianda ken mangidedikar iti biagda ken ni Jehova.

Pudno a narigat a sursuruen ti Tsino a pagsasao. Ngem kas makitatayo kadagiti nadakamat a kapadasan, babaen ti tulong ni Jehova, ti pagayatan ti Dios ket maad-adal dagiti tattao manipud iti adu a pagsasao, agraman dagiti Tsino, nga adda idiay Mexico ken iti dadduma pay a paset ti daga.

[Ladawan iti panid 17]

Maysa a klase nga agad-adal iti Tsino idiay Mexico City

[Ladawan iti panid 18]

Maysa a Mexicana a Saksi a mangyad-adal iti Biblia iti Tsino

[Ladawan iti panid 18]

Panangasaba iti Tsino a pagsasao, idiay Mexico City