Pagbalinenyo a Makaparagsak ti Panagmennamenna
ADDA dagiti tattao a dida kayat ti agmennamenna. Mabalin a matmatanda ti panagmennamenna kas narigat nga aktibidad nga agkasapulan ti napinget a konsentrasion. Mabalin a makariknada met iti pannakakonsiensia no saanda nga agmennamenna, nangruna no mabasada ti kinapateg dayta. (Filipos 4:8) Nupay kasta, mabalin ken talaga a rumbeng laeng a makaparagsak a gundaway ti siuulimek a panangpanunot kadagiti kinapudno a naadaltayo maipapan ken ni Jehova, dagiti agkakasayaat a galadna, dagiti makapaamanga a gapuananna, dagiti kalikagumna, ken ti nadayag a panggepna. Apay?
Ni Jehova a Dios ti Katan-okan nga Agturay iti uniberso ken agtultuloy nga agar-aramid tapno maitungpal ti naindaklan a panggepna. (Juan 5:17) Kaskasdi, isu ket interesado iti pampanunoten ti tunggal agdaydayaw kenkuana. Ammo daytoy ni salmista a David isu nga insuratna iti sidong ti paltiing ti Dios: “O Jehova, sinukimatnak, ket ammonak. Sika naammuam ti panagtugawko ken itatakderko. Naimutektekam ti panunotko manipud adayo.”—Salmo 139:1, 2.
No damo, mabalin a pakaupayan ti maysa ti kinuna ti salmista. Nalabit nga irasonanna, ‘Nupay “adayo” ti Dios, ammona ti tunggal dakes a mapanunotko.’ Sabagay, pagimbagantayo no mabigbigtayo nga ammona dagiti dakes a pampanunotentayo. Matulongannatayo dayta a mangsaranget kadagiti dakes a pampanunot ken mangipudno kadagita iti Dios, no addaantayo kadagiti kasta a pampanunot, a sitatalektayo a pakawanennatayo maibatay iti pammatitayo iti daton a pangsubbot ni Jesus. (1 Juan 1:8, 9; 2:1, 2) Ngem laglagipentayo met a ni Jehova sukimatenna dagiti agdaydayaw kenkuana iti positibo a pamay-an. Ipangagnatayo no agpampanunottayo a siyayaman maipapan kenkuana.
“Ammo kadi a talaga ni Jehova ti amin a naimbag a pampanunoten dagiti minilion nga agdaydayaw kenkuana?” nalabit mayimtuodyo. Sigurado dayta. Impaganetget ni Jesus a maseknan kadatayo ni Jehova idi kinunana a mangipapaay ni Jehova iti atension uray kadagiti babassit a billit-tuleng: “Napatpategkayo ngem iti adu a billit-tuleng.” (Lucas 12:6, 7) Dagiti billit tuleng awan ti kapasidadda a mangpanunot ken ni Jehova. Isu a no maseknan kadakuada ti Dios, anian nga ad-adda pay a maseknan kadatayo ken maragsakan no nadiosan a bambanag ti pampanunoten ti tunggal maysa kadatayo! Wen, kas ken ni David, sitatalek a maikararagtayo: “Ti panagmennamenna ti pusok agbalinda koma a makaparagsak iti sanguanam, O Jehova a Batok ken Mannubbotko.”—Salmo 19:14.
Ti kanayonan a pammaneknek a talaga nga interesado ni Jehova iti panagmennamenna dagiti nasungdo nga agdaydayaw kenkuana ket masarakan iti naipaltiing a sasao ni propeta Malakias. Mainaig iti kaaldawantayo, impakpakaunana: “Iti dayta a tiempo nagsao iti maysa ken maysa dagidiay agbuteng ken Jehova, tunggal maysa iti kaduana, ket ni Jehova nangipangpangag ken immim-imdeng. Ket maysa a libro a pakalaglagipan nangrugi a masuratan iti sanguananna maipaay kadagidiay agbuteng ken Jehova ken maipaay kadagidiay mangpampanunot iti naganna.” (Malakias 3:16) Talaga a mapagbalintayo a makaparagsak ti nadiosan a panagmennamenna no laglagipentayo nga agtultuloy nga ‘ipangpangagnatayo’ ni Jehova no pampanunotentayo ti maipapan kenkuana. Gapuna, iparangarangtayo koma dagiti sasao ti salmista idi insuratna: “Pudno unay a mennamennaekto ti isuamin nga aramidmo, ket kadagiti pannakilangenmo maseknanakto.”—Salmo 77:12.