Panangdanon iti Puso ti Ubing

MALDAANGANKA kadi a makakita iti ubing nga agay-ay-ayam iti video a gubat-gubat? Gagangayen a maimatangan ti kasta a panagay-ayam uray kadagiti babassit pay unay nga ubbing, yantangay ti kinaranggas sinerreknan ti tay-ak ti paglinglingayan. Kasano a matulongam ti maysa nga agtutubo nga agusar kadagiti ay-ayam a mangitampok iti talna imbes a gubat? Ni Waltraud, maysa a nabayagen a misionera dagiti Saksi ni Jehova idiay Africa, nakasarak iti maysa a pamay-an tapno matulonganna ti maysa nga ubing a mangaramid iti kasta.

Gapu iti gubat, masapul a pumanaw ni Waltraud iti lugarna ket umakar iti sabali a pagilian idiay Africa. Sadiay, nangrugi nga inyadalanna iti Biblia ti ina ti maysa nga ubing a lalaki nga agtawen iti lima. Kada sarungkaranna ti ina, agay-ayam ti ubing iti plastik a paltog, ti kakaisuna nga ay-ayamna. Di pulos nakita ni Waltraud nga impaturong ti ubing ti paltog, ngem kanayon a kalasen ken sangalenna ti paltog, a kasla ket karkarganna iti bala.

Kinuna ni Waltraud iti ubing: “Werner, ammom kadi no apay nga addaak ditoy pagilianyo? Gapu iti gubat​—masapul a panawak ti pagiliak tapno maliklikak dagiti napeggad a tao a mangdangdangran kadagiti tattao babaen kadagiti paltog a kas iti ay-ayammo. Ti panagkunam kadi nasayaat ti pumaltog?”

“Saan,” sililiday nga insungbat ni Werner.

“Husto ti kunam,” kinuna ni Waltraud. Kalpasanna, inyimtuodna: “Ammom kadi no apay a linawas a sarsarungkarankayo ken ni nanangmo? Kayat ngamin dagiti Saksi ni Jehova ti tumulong kadagiti tattao a makikapia agpadpada iti Dios ken kadagiti kaarrubada.” Iti pammalubos ti ina ni Werner, kinuna ni Waltraud kenkuana: “No itedmo kaniak dayta a paltog, ibellengko dayta, ket ikarik nga ikkanka iti ay-ayam a trak nga uppat ti pilidna.”

Inyawat ni Werner ti ay-ayamna a paltog. Masapul nga aguray iti uppat a lawas, ngem kalpasanna siraragsak a naawatna ti maysa nga ay-ayam a trak a naaramid iti kayo.

Iwaywayaam kadi ti makisarita kadagiti annakmo, nga ikagkagumaan a danonen ti pusoda tapno matignayda a mangliklik kadagiti ay-ayam a kalanglanga dagiti armas a pakigubat? No wen, isursurom kadakuada ti leksion a pagimbaganda iti tungpal biag.