Ania ti Panggep ti Dios Agpaay iti Daga?
APAY a naragsakka no magmagnaka iti parke wenno iti hardin dagiti nabanglo a sabsabong? Apay a makapasalibukag iti rikna no makakitaka iti napintas a danaw wenno nangangato a bantay a naabbongan kadagiti ulep ti alimpatokda? Apay nga imutektekam a denggen ti panagkanta dagiti tumatayab bayat nga addada kadagiti kaykayo? Ken apay a makaay-ayo a kitaen ti naparagsit nga ugsa nga aglagtolagto wenno ti maysa nga arban dagiti karnero nga agar-arab iti tay-ak?
Awanen ti sabali pay a sungbat kadagita a saludsod—naparsuatayo ngamin nga agbiag iti Paraiso! Iti kasta a lugar a nagbiag dagiti umuna a nagannak kadatayo, da Adan ken Eva. Pinarsua ida ni Jehova nga addaan iti tarigagay nga agbiag iti Paraiso, ket natawidtayo dayta a tarigagay. Ammo ni Jehova a naragsaktayo nga agbiag iti Paraiso agsipud ta pinarsuanatayo nga addaan kadagiti galad a kasapulan tapno matagiragsaktayo ti kasta a naisangsangayan a pagtaengan a daga.
Apay a pinarsua ni Jehova ti daga? ‘Binukelna dayta tapno pagnaedan’ ti sangatauan. (Isaias 45:18) “Ti Nangaramid iti daga” impaayanna da Adan ken Eva iti napintas a paraiso a pagtaengan, ti minuyongan ti Eden. (Jeremias 10:12; Genesis 2:7-9, 15, 21, 22) Tinagiragsakda la ketdi dagiti karayan, dagiti sabsabong, dagiti kaykayo! Adda dagiti nadaeg a tumatayab iti tangatang, ken nagduduma a kita ti animal nga agdakdakiwas iti daga—awan kadagitoy ti namagpeggad kadagiti tattao. Adda dagiti ikan ken dadduma pay a parsua nga agbibiag iti nalitnaw, nadalus a kadanuman. Kapatgan iti amin, agkatakunaynay da Adan ken Eva. Mabalinda ti aganak ken pagsaknapenda ti Paraiso a pagtaenganda a siraragsak a kaduada ti dumakdakkel a pamiliada.
Nupay saan ita a paraiso ti daga, mabalin a mayasping dayta iti napintas a pagtaengan ti maysa a naragsak a pamilia. Ti daga nga inted ti Dios a pagtaengantayo ket addaan kadagiti kasapulantayo—lawag, pudot, danum, ken taraon. Kasta unay ti panangipategtayo iti lawag ken pudot ti init ken ti makaay-ayo a lawag ti bulan no rabii! (Genesis 1:14-18) Iti kaunggan ti daga, adda ti pagapuy a kas iti karbon ken langis a mabalin a pagpapudot. Babaen ti siklo ti danum ken ti sistema ti karayan, danaw, ken baybay, adda danumtayo. Malaksid kadagita, kasla nakawesan ti dagatayo iti berde a ruruot.
Kas iti balay a naabastuan iti taraon, nawadwad met ti taraon iti daga. Babaen kadagiti apit iti kataltalonan ken bungbunga kadagiti minuyongan, ‘ikkannatayo ni Jehova kadagiti nabunga a panawen ken punnuenna dagiti pusotayo iti ragsak.’ (Aramid 14:16, 17) No ita pay laeng ket nagsayaaten a pagtaengan ti daga, anianto laengen ti kasasaad inton ni Jehova a “naragsak a Dios” aramidenna dayta a paraiso!—1 Timoteo 1:11.
[Picture Credit Lines iti panid 2]
AKKUB: Daga: retrato manipud NASA; Bitbituen: NASA, ESA ken AURA/Caltech