‘Ti Mapanunotko a Kasayaatan a Panagleppas’
INSURAT ti maysa a mannursuro iti haiskul idiay Espania: “Iti nasuroken a sangagasut a tawen, naipakita dagiti Saksi ni Jehova ti pudno a panagkaykaysa, awan pakaumsianna a kinamapagpiaran, ken kangrunaan iti amin, di maisin a pammati.” Nupay maysa nga ateista daytoy a mannursuro, apay a kasta ti nakunana?
Nangrugi dayta idi a ni Noemí, a maysa nga estudiante ti haiskul ken maysa a Saksi ni Jehova, ket nadutokan a mangisurat iti maysa a salaysay kas paset ti maudi nga eksaminasion iti panageskuelana. Inkeddengna ti mangputar iti salaysay a napauluan iti “Dagiti Lila a Trianggulo iti Sidong ti Panangituray ti Nazi.”
Apay a pinilina dayta a tema? Inlawlawag ni Noemí: “Yantangay maysa a mannursuro ti mangimaton iti trabahok, napanunotko nga alaen dayta a gundaway tapno mangasaba. Natukay ti riknak iti pakasaritaan dagiti Saksi ni Jehova a sititibker a nangsalimetmet iti kinatarnawda iti sidong ti Nazi nga Alemania. Patiek a magustuan met dayta dagiti sabsabali.”
Saan a ninamnama ni Noemí ti kaadu dagiti tattao a nangapresiar iti trabahona. Idi Oktubre 5, 2002, nakaawat ni Noemí iti premio gapu iti salaysayna a nairaman iti sangapagilian a salip mainaig iti panagsirarak iti tay-ak ti siensia ken panagadal iti kinatao. Dagiti premio iti dayta a kompetision ket impaay ti maysa a hurado a buklen ti 20 a propesor manipud kadagiti nalatak nga unibersidad idiay Espania.
Naawat ni Noemí ti premiona manipud ken ni Pilar del Castillo, ti Espaniol a ministro ti edukasion. Ginundawayan ni Noemí nga impaayan ti ministro iti kopia ti videocassette a Jehovah’s Witnesses Stand Firm Against Nazi Assault. Siraragsak nga inawat ti ministro ti sagut.
Iti pagiwarnak idiay Manresa nga ili ni Noemí, naitampok ti akademiko a nagapuananna ken narepaso ti linaon ti salaysayna. Kabayatanna, ti prinsipal iti eskuelaanna nagkiddaw iti maysa a kopia ti salaysayna tapno mairaman daytoy iti programa ti pananglaglagip iti maika-75 nga anibersario ti eskuelaan.
“Daytoy ti mapanunotko a kasayaatan a wagas ti panagleppas ti panagadalko iti haiskul,” kuna ni Noemí. “Maragsakanak unay idi mabasak daytoy nga insurat ti mannursurok a ni Mr. Jorge Tomás Calot kas paset ti introduksionna iti salaysayko:
“‘Maysaak nga ateista, ngem naan-anay a kombinsidoak nga adda ti Katan-okan a Persona, a mangtigtignay kadagiti agdaydayaw kenkuana a mangiparangarang iti napudno nga “ayat iti kaarruba.”’”