Panagsarungkar a Namagbalbaliw

“MAGAGARANAKON a mangipakaammo iti pamiliak ti maipapan kadagiti dua nga ‘anghel’ nga imbaon kaniak ti Dios.” Insurat dayta ti maysa a lalaki a sinarungkaran ti dua nga agtutubo a babbai a Saksi ni Jehova. Sumagmamano a lawas sakbay ti isasarungkarda, pimmusay ni baketna a nakatakunaynayna iti 45 a tawen. Kasta unay ti leddaangna. Nangliwliwa dagiti nataenganen nga annakna, ngem adayo ti pagnanaedanda. Awan ti simmarungkar kenkuana a gagayyem wenno kaarruba.

“Saanakon nga agkarkararag iti Dios,” kinuna daytoy a lalaki kadagiti agtutubo a simmarungkar kenkuana. Kaskasdi, nakipagriknada ken nangibatida kenkuana iti bassit a naibatay-Biblia a polieto a napauluan Aniat’ Namnama Dagiti Ing-ingungoten a Natayen? Binasana iti dayta a rabii ket naliwliwa.

Di nagbayag, nagsubli dagiti dua a Kristiano a babbai. Malagipda ngamin no kasano kaladingitna idi damo a nakasaritada isu nga immayda komustaen. “Nasdaawak,” insurat ti lalaki, “ta dagitoy a dua a diak pulos am-ammo nangipakitada iti pannakaseknan kaniak.” Naparegta kadagiti kapanunotan manipud iti Biblia nga inranudda kenkuana. Imbaga dagiti Saksi a sumarungkardanto manen. Naragsakan ti lalaki isu a sinuratanna ti Kingdom Hall dagiti Saksi ni Jehova iti lugarda. Paset ti suratna dagiti sasao a nadakamat iti ngato.

Sakbay nga immakar iti lugar nga asideg iti maysa kadagiti annakna, timmabuno daytoy a lalaki iti Nakristianuan a gimong dagiti Saksi ni Jehova ken naawis iti pannangan ti pamilia ti maysa kadagiti agtutubo a simmarungkar kenkuana. Insuratna: “Pumanawak ditoy a lugar, ngem diakto pulos malipatan ken kanayon nga iramanko kadagiti karkararagko dagidiay nga agtutubo ken ti kongregasionyo. Wen, kanayonak itan nga agkararag. Naan-anay a nagbalbaliwakon. Dakkel ti naitulong dagidiay nga agtutubo tapno maaramidak dayta, ket agnanayonto a bigbigek ti naimbag a nakem kadakuada.”