“Manipud Ita, Mamatiakon nga Adda Dios”
ITI panagawidna manipud trabaho, maysa a bassit a kahon iti pagsardengan ti lugan ti nakita ti taga-Ukraine a ni Alexandra, nga agnanaed idiay Prague, Czech Republic. Ti kahon ket masansan a makugtaran dagiti lumablabas. Idi pinidut ken linuktanna ti kahon, nasdaaw iti nakitana. Naglaon dayta kadagiti sag-5,000 a koruna [130 a euro]! Awan ti nadlawna a mangsapsapul iti dayta a kahon. Kas ganggannaet idiay Czech Republic, narigat ti biag para ken ni Alexandra. Ania ti aramidenna?
Idi nakaawiden, impakita ni Alexandra ti kahon iti anakna a ni Victoria. Sinukimatda ti kahon ngem awan ti nakitada a nagan ken adres ti makinkukua. Nupay kasta, naglaon ti kahon iti bassit a papel a nasuratan iti sumagmamano a numero. Naisurat iti papel ti maysa a numero ti deposito iti banko, ken adda pay ti dadduma a numero iti likud ti papel. Naglaon pay ti kahon iti adres ti lokal a banko ken surat a nakailanadan ti “330,000 koruny” (agarup $10,000, U.S.). Isu dayta ti eksakto a kantidad ti kuarta iti kahon.
Napaay ti panangikagumaan ni Alexandra a mangtelepono iti banko babaen ti numero a kasla numero ti telepono. Gapu iti dayta, napanda ken ti balasangna iti banko ket inlawlawagda ti napasamak. Nagimtuodda maipapan iti numero ti banko a nakitada iti kahon. Nupay kasta, dayta a numero ket awan iti rekord ti banko. Iti simmaganad nga aldaw, nagsubli ni Alexandra ket nagdamag maipapan iti sabali pay a numero nga adda iti kahon. Naammuanda a ti makin-numero iti dayta ket maysa a babai a kliente ti banko. Inkagumaan da Alexandra ken Victoria a kinontak ti babai, ket pinaneknekanna nga isu ti napukawan. Idi nagkikitada, nagyaman kadakuada ti babai ket inyimtuodna, “Ania ti kayatyo a gunggona gapu iti panangisubliyo iti kuarta?”
Insungbat ni Victoria: “Awan ti gunggona a namnamaenmi. No tinarigagayanmi ti kuarta, saanmi koman nga insubli.” Iti bassit nga ammona iti Czech, inlawlawagna: “Insublimi ti kuartam agsipud ta dakami ket Saksi ni Jehova. Gapu iti konsiensiami a sinanay ti Biblia, saanmi a maitured a tagikuaen ti saanmi a kukua.” (Hebreo 13:18) Siraragsak a kinuna ti babai, “Manipud ita, mamatiakon nga adda Dios.”