“Anian a Panagayatko iti Lintegmo!”
TI Salmo 119 ket maysa a kanta maipapan iti panagrikna ti nangputar iti dayta a salmo mainaig iti naipaltiing a mensahe wenno sao ti Dios. Inkanta ti salmista: “Iti pusok indulinko ti sasaom.” “Kadagiti paglintegam ipakitakto ti panangay-ayat.” “Ti kararuak maidagel iti panangil-iliw kadagiti hudisial a pangngeddengmo iti isuamin a tiempo.” “Dagiti pammalagipmo isuda ti pakaay-ayatak.” “Inil-iliwko dagiti bilinmo.” “Ipakitakto ti panangay-ayat kadagiti bilinmo nga inayatko.” “Ipamaysakto ti bagik kadagiti alagadem.” “Anian a panagayatko iti lintegmo! Iti intero nga agmalem isu dayta ti pakaseknak.”—Salmo 119:11, 16, 20, 24, 40, 47, 48, 97.
Naimpusuan unay ti panagyaman ti salmista gapu iti naipalgak a sao ti Dios! Kasta met kadi ti panagriknam iti mensahe ti Sao ti Dios a ti Biblia? Kayatmo kadi a patanoren ti panangapresiar iti dayta? No kasta, umuna nga iyugalim ti agbasa iti Biblia. No mabalin, inaldaw nga agbasaka. Kinuna ni Jesu-Kristo: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mateo 4:4) Maikadua, rumbeng a mennamennaem ti nabasam. Ti panangutob kadagiti kinapudno maipapan iti Dios, dagiti galadna, ti pagayatanna, ken ti panggepna parayrayenna ti apresasiontayo iti Biblia. (Salmo 143:5) Kangrunaanna, inaldaw nga iyaplikarmo ti nagsayaat a balakadna.—Lucas 11:28; Juan 13:17.
Apay a magunggonaanka no patanorem ti panangapresiar iti ibagbaga ti Biblia? “Naragsak dagidiay mangsalsalimetmet kadagiti pammalagip [ti Dios],” kuna ti Salmo 119:2. Dagiti pammalagipna a mabasa iti Biblia tulongannaka a sibaballigi a mangdaer kadagiti parikut iti panagbiag. (Salmo 1:1-3) Maaddaanka iti sirib, pannakatarus, ken pannakaawat, a makatulong kenka a ‘mangpawil kadagiti sakam iti dakes a dana.’ (Salmo 119:98-101) Ti pannakaammom iti kinapudno maipapan iti Dios ken ti panggepna ditoy daga pagbalinenna a naragragsak ti biagmo ken parayrayenna ti namnamam iti masanguanan.—Isaias 45:18; Juan 17:3; Apocalipsis 21:3, 4.
Interesado unay dagiti Saksi ni Jehova a tumulong kadagiti sabsabali a mangadal a naimbag iti Biblia ken mangpatanor iti panagayatda iti mensahena. Maragsakankami a sumarungkar kadakayo.