Ni Daniel ken ti Lapel Card-na iti Kombension

BINABALAW ni Jesus dagiti aginlilinteg a pangulo ti relihion a nakapungtot idi nakitada dagiti ubbing a lallaki a mangidaydayaw iti Dios iti publiko. Maitutop unay ti inyimtuod ni Jesus kadakuada: “Saanyo aya a pulos nabasa daytoy, ‘Manipud iti ngiwat dagiti ubbing ken agsussuso nangipaayka iti dayaw’?”​—Mateo 21:15, 16.

Ti agtawen iti innem a ni Daniel, a naitimpuyog iti Ruso ti pagsasaona a kongregasion idiay Alemania, pinaneknekanna nga adda dagiti ubbing nga agdaydayaw ken ni Jehova uray iti panawentayo. Kaduana ni nanangna ken ni manangna a timmabuno iti kombension dagiti Saksi ni Jehova idiay Duisburg. Daydi ti damo nga itatabunoda iti kasta a dakkel a kombension. Kabbaro kadakuada ti amin a banag: ti otel, ti nagadu a timmabuno a sitatalna a nagimdeng iti tallo nga aldaw, ti bautismo, agraman ti drama. Komusta ngay ni Daniel? Mapagwadan ti kababalinna.

Iti Lunes, idi nakaawiddan kalpasan ti kombension, nasapa a nagriing ni Daniel tapno mapan ageskuela iti kindergarten. Ngem ania ngay ti nakaalpiler pay laeng iti jacket-na? Ti lapel card a nangyam-ammo kenkuana kas maysa a delegado iti kombension! Inlawlawag ni nanangna kenkuana: “Nalpasen ti kombension. Mabalinmon nga ikkaten ti lapel card-mo.” Ngem kinuna ni Daniel: “Kayatko a maammuan ti amin no napanak ken no ania ti nasursurok sadiay.” Isu nga iti agmalem a panageskuelana iti kindergarten, siraragsak nga inusarna ti lapel card-na. Idi dinamag ti maestrana ti maipapan iti dayta, inlawlawag kenkuana ni Daniel ti programa ti kombension.

Babaen iti dayta, tultuladen ni Daniel ti ulidan ti rinibu nga ubbing a lallaki ken babbai nga iti ginasut a tawenen, idaydayawda ni Jehova iti publiko.