Ania ti Ibilangmo a Balligi?

GAPU kadagiti nainsiriban a desisionna iti negosio, naibilang ni Jesse Livermore kas ti kaballigian a mannakitransaksion iti Wall Street iti amin a tiempo. Dayta ti makagapu a nagbalin a nakabakbaknang. Agkawes kadagiti napipintas a dinait ti ima nga americana, agnanaed iti mansion a 29 ti kuartona, aglugan iti nangisit a kotse a Rolls-Royce ken adda bukodna a drayber.

Kasta met ti tartarigagayan ni David.a Kas bise presidente ken general manager iti dakkel a kompania ti grapika, mabalin nga agbalinto a presidente iti maysa a dibision dayta a kompania. Kayatna a talaga ti agbalin a nabaknang ken nalatak. Nupay kasta, inkeddeng ni David ti agikkat. “Ammok a saanakto a makagun-od manen iti kasta kangato a saad iti kompania,” kinuna ni David. Panagkunam, nagkamali ngata ni David?

Adu ti mamati a naballigika no nabaknang, maidaydayaw, wenno nalatakka. Nupay kasta, uray dagidiay nasaliwanwan iti material naladingitda met ken awan panggep ti biagda. Nalawag a kastoy ti kasasaad ni Mr. Livermore. Nupay nabaknang, naladingit ken nakalkaldaang ti biagna. Nagpasar iti nakaro a leddaang, di naballigi a panagasawa, ken di nasinged a relasion kadagiti annakna. Kamaudiananna, idi adun ti napukaw a kinabaknangna, nagtugaw iti paginuman ti arak (bar) iti maysa a nalatak a hotel ket sinangitanna dagiti pukawna. Gimmatang iti naingel nga inumen, inruarna ti kuadernona, ket nagsurat iti pammakada ken ni baketna. Idi nakainumen, simrek iti maysa a nalidem a kuarto sa nagpakamatay.

Nupay nagadu ti pakaigapuan ti panagpakamatay, makita iti daytoy a kapadasan nga agpayso ti kuna ti Biblia: “Dagidiay determinado a bumaknang . . . sinalputda ti intero a bagbagida iti adu nga ut-ot.”​—1 Timoteo 6:9, 10.

Saan ngata a nagbiddut ti panangmatmat dagidiay agkuna a ti balligi ket agpannuray iti kinabaknang, saad, wenno kinalatak? Ibilangmo kadi ti bagim a naballigi? Apay a kasta ti kunam? Ania ti nakaibatayan ti ibilangmo a balligi? Ania ti nangimpluensia iti panangmatmatmo iti balligi? Usigen ti sumaganad nga artikulo ti nabayagen a balakad nga inyaplikar ti nagadu a tattao tapno maragpatda ti balligi. Kitaentayo no kasano met nga agballigika.

[Footnote]