Nabiit a Basaen Ngem Umiso Kadi?
IDI Setiembre 2005, sigagagar ti Church of England a nangiruar iti The 100-Minute Bible. Gapu ta nairanta a mabasa iti las-ud ti 100 a minuto, ti baro a bersion ginupgopna ti Hebreo a Kasuratan iti 17 a seksion ken ti Griego a Kasuratan iti 33 a seksion, a ti tunggal seksion ket saggaysa a panid. Gapuna, kinuna ti maysa a nangbasa iti dayta a naikkat ti amin a “makauma a pasetna.” Agpayso a nabiit a basaen, ngem umiso kadi?
Malaksid iti pannakaikkat ti nadibinuan a nagan a Jehova, makita dagiti napasnek a mangad-adal iti Biblia ti adu a sabali pay a nakaidumaanna. (Salmo 83:18) Kas pagarigan, kuna ti seksion 1 a ti Dios “pinarsuana ti daga iti las-ud ti innem a literal nga aldaw.” Ngem ti Genesis 1:1, kunana laeng: “Idi punganay, ti Dios pinarsuana ti langlangit ken ti daga.” Kalpasanna, deskribiren ti orihinal a salaysay ti dadduma pay a naaramid a panamarsua mainaig iti daga, a nagpaut iti innem nga “aldaw,” wenno panawen. Kalpasanna, ginupgop ti Genesis 2:4 ti intero a panawen ti panamarsua. Inawaganna dayta iti “aldaw a ni Jehova a Dios inaramidna ti daga ken langit.”
Sigun iti The 100-Minute Bible, ni Job, a maysa a natarnaw a lalaki, ket rinaut ti “maysa kadagiti adipen ti [Dios], ni Satanas, . . . a ti akemna ket mangakusar iti sangatauan.” Makitayo kadi ti biddut ditoy? Ti sao a “Satanas” kaipapananna “Bumusbusor.” Imbes nga adipen ti Dios, iti kinapudnona, ni Satanas ti kangrunaan a kabusor ti Dios ken isu a mismo ti namagbalin iti bagina a manangakusar iti sangatauan.—Apocalipsis 12:7-10.
Ti ngay Kristiano a Griego a Kasuratan a paset ti The 100-Minute Bible? Iti pangngarig ti karnero ken kalding, kuna ti baro a bersion nga anamongan ni Jesus dagidiay timmulong iti “siasinoman, kasanoman kabassit dayta,” idinto a ti talaga a kinuna ni Jesus ket bendisionanna dagidiay agaramid iti naimbag kadagiti pasurotna—dagiti ‘kakabsatna.’ (Mateo 25:40) Ti nasumario nga Apocalipsis ibagana kadagiti agbasbasa a ti “Roma, ti dakkel a Babilonia, naan-anayto a madadael.” Ngem ammo dagiti estudiante ti Biblia a saan a dinakamat ti orihinal a surat ti partikular a tuktukoyenna a “Babilonia a Dakkel.”—Apocalipsis 17:15–18:24.
Para kadagiti agtarigagay a mangammo iti Namarsua kadatayo ken maaddaan iti pannakaawat kadagiti panggepna, awan ti mabalin nga isukat iti kompleto a Biblia. Agpayso a napapaut ngem 100 a minuto ti panangbasa iti Biblia, ngem nakapatpateg dagiti magunggona iti panangbasa iti dayta. (Juan 17:3) Sapay koma ta pagreggetanyo a basaen ket magunggonaankayto a mismo.—2 Timoteo 3:16, 17.