Pagwadan iti Kinamapagpiaran

NABIIT pay a nasubok ti Nakristianuan a kinatarnaw ni Nelma, maysa a mammukis idiay Cruzeiro do Sul, Brazil. Idi nalayus ti lugarna, nakaawat ni Nelma iti dadduma a naidonar a kawes manipud iti maysa kadagiti kostumerna. Bayat a pinaglalasinna dagiti kawes, nakasarak iti kuarta nga agdagup iti $1,000 (U.S.), (agarup ₱50,000.00 ti sukatna ita) iti bulsa ti dadduma kadagiti pantalon.

Ti kuarta a nasarakan ni Nelma ket katupag ti agarup pito a bulan a sueldona, ken talaga a kasapulanna dayta. Nakaro ti pannakadadael ti balayna gapu iti layus, ken napukaw ti kaaduan kadagiti gargaret ni tatangna agraman dagiti kakabsatna. Babaen iti dayta a kuarta, mabalin a maipatarimaanna ti balayna ket adda pay nabati a mabalinna nga itulong iti kakabagianna. Nupay kasta, saan a tinagikua ni Nelma dayta a kuarta gapu ta sidiren ti nasanay iti Biblia a konsiensiana.​—Hebreo 13:18.

Iti simmaruno nga aldaw, nasapa a napan iti trabahona sakbay ti gagangay nga oras ti panagtrabaho sana kinasarita ti negosiante a nangidonar iti kawes. Nagyaman ni Nelma kenkuana gapu kadagiti kawes ngem kinunana nga adda masapul nga isublina a kuarta a nasarakanna iti maysa kadagiti bulsa. Napalaus ti ragsak dayta a babai idi naawatna ti kuarta. Indulinna gayam dayta a nairanta a pangsueldona koma kadagiti empleadona. “Natakkon itan dagiti mapagpiaran,” kinuna ti negosiante.

Kinapudnona, mabalin nga ipagarup ti dadduma nga awanen ti serserbi ti panagbalin a mapagpiaran. Nupay kasta, ti kinamapagpiaran ket maysa a kualidad nga ipatpateg unay dagidiay mangikagkagumaan a mangparagsak iti pudno a Dios a ni Jehova. (Efeso 4:25, 28) “Diak makaturog iti rabii no saanko nga isubli dayta,” kinuna ni Nelma.