Napatpateg nga Amang Ngem iti Paniempo

DANDANI amin a pagilian ket addaan kadagiti pagsasao maipapan iti paniempo: No lumabaga ti tangatang iti rabii, maayatan dagiti marino; ngem no lumabaga ti tangatang iti agsapa, pakdaar dayta kadagiti marino. Ibagbaga dagiti meteorologo nga adda dagiti naisangsangayan a rason no apay a ti paniempo apektaranna ti kolor ti langit.

Idi panawen ni Jesus, dagiti tattao palpaliiwenda met ti langit sada ikkan ti kaipapananna. Kinuna ni Jesus kadagiti dadduma a Judio: “No dumteng ti rabii nakayugalianyo a kunaen, ‘Nasayaatto ti paniempo, ta ti tangatang lumabaga a kas iti apuy’; ket iti bigat, ‘Nalam-ekto, natutudo a panawen ita, ta ti tangatang lumabaga a kas iti apuy, ngem nalulem ti buyana.’ Ammoyo no kasano nga itarusan ti langa ti tangatang, ngem . . .” Ngem ania? Intuloy nga imbaga ni Jesus dagitoy naisangsangayan a sasao: “Dagiti pagilasinan dagiti tiempo saanyo a kabaelan nga itarusan.”​—Mateo 16:2, 3.

Ania dagitoy a “pagilasinan dagiti tiempo”? Dagitoy dagiti adu a nalawag a pakakitaan a ni Jesus ti pudno a Mesias nga imbaon ti Dios. Nakalawlawag dayta kadagiti tigtignayna a kas iti kinalabaga ti langit. Nupay kasta, kaaduan kadagiti Judio inyaleng-alengda dagiti pagilasinan a nangipakita a dimtengen ti Mesias​—maysa a pasamak a napatpateg ngem iti paniempo.

Itatta, adda met maysa a pagilasinan a napatpateg nga amang a tarusantayo ngem iti kolor ti literal a langit. Impadto ni Jesus nga agpatingga daytoy dakes a lubong tapno mairugi ti maysa a nasaysayaat a lubong. Nangdakamat iti adu a pasamak a no pagtitiponen, ipakitana no kaano a dumteng daytoy a panagbalbaliw. Karaman kadagitoy dagiti gubgubat iti lubong ken dagiti bisin. Imbaga ni Jesus a no makitatayo dagitoy a bambanag, asidegen ti tiempo a pannakibiang ti Dios.​—Mateo 24:3-21.

Makitkitayo kadi dagiti “pagilasinan dagiti tiempo”?