“Awatenyo Koma ti Nanumo a Sagutko”

DAGITA a sasao ket nailanad iti maysa a surat a naawat ti sanga nga opisina dagiti Saksi ni Jehova idiay Russia. Naipakuyog iti dayta a surat ti maysa a dakkel a kahon a napno iti delana a medias.

Dayta a sagut ket impatulod ti 67 anyos a ni Alla, maysa kadagiti Saksi ni Jehova iti maysa a kongregasion idiay Adayo a Daya ti Russia. Ni Alla ket nasurok a 10 a tawenen nga agserserbi kenni Jehova, a sireregta a mangikaskasaba iti naimbag a damag ti Pagarian. Nupay kasta, paralisado ti dadduma a paset ti bagina gapu iti kellaat a pannakaistrokna. Ngem gapu iti ayat, natignay ni Alla a mangtulad iti inaramid ni Dorcas, maysa a Kristiano idi umuna a siglo, a nangaramid iti kawkawes agpaay kadagiti kapammatianna.​—Aramid 9:36, 39.

Kastoy ti kinuna ni Alla iti suratna: “Diak maigaraw dagiti sakak, ngem maigarawko pay dagiti imak. Isu a mangaskasabaak babaen kadagiti surat.” Innayonna: “Napanunotko a yantangay maigarawko pay laeng dagiti imak, agaramidak kadagiti naimeng a medias. Kayatko nga ited dagitoy kadagiti kapammatiak a mapan agbangon kadagiti Kingdom Hall kadagiti nalamiis a lugar a kas iti Siberia ken iti Adayo a Daya ti Russia.”

Maipapan kadagiti pudno a pasurotna, kinuna ni Jesu-Kristo: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Ti ayat a kas iti impakita ni Alla ket maysa a pakailasinan dagiti pudno nga adalan ni Jesus.