Sangalubongan a Panagkaykaysa—Posible Kadi?
ANIA ti agur-uray iti lubong—talna wenno pannakadadael? Agparang nga adda natalged a pammaneknek a posible ti aniaman kadagitoy.
Iti maysa a dasig, kombinsido ti dadduma a lider ti lubong a maragpattayo ti sangalubongan a talna ta no saan, nakaam-amak ti mapasamak. Iti sabali a dasig, adu ti maamak kadagiti sumaganad a saludsod: Ania dagiti pagilian nga addaan kadagiti igam a makabael a mangtalipupos iti sangatauan? Usarendanto ngata dagita? Ania ti mapasamak no usarenda?
Ipakita ti historia a ti panagsisinnalisal ken panangidumduma ti nanglapped iti pannakaragpat ti panagkaykaysa, ken masansan a rinubroban dayta ti relihion imbes a sebsebanna koma. “Aniaman a mamagsisina iti tattao pakaruenna ti panagbibinnusor. Ti relihion ti maysa a kangrunaan a pakaigapuan ti panagsisina,” kuna ti mannurat a ni James A. Haught. “Nupay kadawyan a mamatmatan a ti relihion ti mamagbalin kadagiti tattao a ‘nasingpet,’ nalawag a duroganna met ti dadduma a mangaramid iti nakaam-ames a banag.” Kasta met ti panangmatmat ti autor a ni Steven Weinberg. Insuratna: “Ti relihion ti mangituggod kadagiti nasingpet a tattao nga agaramid iti dakes.”
Magun-odto pay ngata ti sangalubongan a panagkaykaysa? Wen! Ngem saan a ti tao wenno dagiti relihion ti mangyeg iti dayta, kas ipakita ti sumaganad nga artikulo.
[Blurb iti panid 3]
Kasla kadi granada ti lubong a dandanin bumtak?