Saludsod Dagiti Agbasbasa
Adda Kadi ti Pagarian ti Dios iti Pusoyo?
Wen ti sungbat ti adu a tattao iti dayta a saludsod. Kas pagarigan, kuna ti The Catholic Encyclopedia: “Ti pagarian ti Dios kaipapananna . . . ti panagturay ti Dios kadagiti pusotayo.” Kasta ti kadawyan nga isursuro dagiti klero. Ibaga kadi ti Biblia a nagsaad ti Pagarian ti Dios kadagiti puso ti tattao?
Ipapan ti dadduma a ni Jesus a mismo ti immuna a nangisuro iti ideya a nagsaad ti Pagarian ti Dios iti puso dagiti tattao. Agpayso a kinuna ni Jesus: “Adtoy! Ti pagarian ti Dios adda iti tengngayo.” (Lucas 17:21) Kastoy ti kuna ti dadduma a patarus: “Adda kadakayo ti pagarian ti Dios” wenno “iti unegyo” pay ketdi. Umiso kadi dagita a pannakaipatarus ti sasao ni Jesus? Talaga kadi a ti Pagarian ti Dios ket adda iti puso dagiti tattao?
Umuna, panunotenyo ti kasasaad ti puso ti tao. No mausar daytoy iti Biblia, ti piguratibo a puso ket tumuktukoy iti makin-uneg a kinatao ti maysa, daydiay pagtaudan ti pampanunot, kababalin, ken rikrikna. Mabalin a makaay-ayo a panunoten a ti maysa a natan-ok a banag a kas iti Pagarian ti Dios ket agnanaed iti puso dagiti tattao—yantangay kabaelanna a baliwan ti kababalinda. Ngem lohikal kadi ti kasta a kapanunotan?
Ibaga kadatayo ti Biblia: “Ti puso nagulgulib ngem iti aniaman a banag ket desperado.” (Jeremias 17:9) Mismo a ni Jesus ti nagkuna: “Manipud iti uneg, manipud iti puso dagiti tattao, rummuar dagiti makadangran a panagrasrason: dagiti pannakiabig, dagiti panagtakaw, dagiti panangpapatay, dagiti pannakikamalala, dagiti panagagum, dagiti aramid ti kinadangkes.” (Marcos 7:20-22) Panunotenyo: Saan kadi a ti managbasol a puso ti tao ti pakaigapuan ti adu a kinakas-ang a makitkitatayo iti lubong ita? Ngarud, kasano koma a makuna a naggapu iti puso ti tao ti perpekto a Pagarian ti Dios? Imposible nga agtaud ti Pagarian ti Dios iti puso ti tao no kasano a dagiti higos saan nga agtaud iti siit.—Mateo 7:16.
Maikadua, panunotenyo dagiti agdengdengngeg ken Jesus idi insawangna dagiti sasao a nairekord iti Lucas 17:21. Kuna ti sarsarunuenna a bersikulo: “Idi nagimtuodan dagiti Fariseo no kaano nga umay ti pagarian ti Dios, sinungbatanna ida.” (Lucas 17:20) Kabusor ni Jesus dagiti Fariseo. Kinuna ni Jesus a saan a makastrek iti Pagarian ti Dios dagita a managinsisingpet. (Mateo 23:13) Ita, no saan a makastrek iti Pagarian iti Dios dagidi a Fariseo, makuna ngata nga adda kadagiti pusoda ti Pagarian? Imposible! Ania ngarud ti kayat a sawen ni Jesus?
Iti panangipatarusda kadagitoy a sasao ni Jesus, adu a naannad ti pannakaipatarusna a Biblia ti nangusar kadagiti umasping a sasao a kas iti inusar ti Baro a Lubong a Patarus. Sigun iti dadduma a patarus, ti Pagarian ket “adda kadakayo” wenno “adda iti tengngayo.” Kasano nga adda ti Pagarian ti Dios iti tengnga dagiti tattao kadagidi a panawen, a pakairamanan dagiti Fariseo? Bueno, ni Jesus ti dinutokan ni Jehova a Dios nga agari iti Pagarian. Kas ti Nadutokan nga Ari, adda ni Jesus iti tengnga dagidi a tattao. Insurona ti maipapan iti Pagarian ti Dios ken nangaramid pay kadagiti milagro kas panirigan iti ibanagto dayta a Pagarian. No an-anagen ngarud, adda ti Pagarian iti tengngada.
Nalawag, awan ti Kasuratan a mangsuporta iti ideya nga adda ti Pagarian ti Dios iti puso dagiti tattao. Imbes ketdi, maysa dayta a pudno a gobierno a mangyeg iti dakkel a panagbalbaliw ditoy daga, kas impadto dagiti propeta.—Isaias 9:6, 7; Daniel 2:44.