“Babai nga Israelita” iti Kaaldawantayo

IDIAY Praia Grande, Brazil, dua a lawas sakbay ti Pananglaglagip iti ipapatay ni Jesus, inlista ti tunggal miembro ti pamilia Sales no asino dagiti awisenda. Inikkanda iti maysa a kopia ti imbitasion ti anakda a ni Abigayl nga agtawen iti innem ket dinamagda no asino ti awisenna.

“Ti lalaki a kanayon nga umis-isem kaniak,” kinunana.

“Asino?” inimtuod dagiti dadakkelna.

“Daydiay naka-wheelchair,” kinunana.

Uppat nga aldaw kalpasanna, intudo ni Abigayl kadagiti dadakkelna no asino dayta a lalaki. Isu ni Walter, nga agnanaed iti asideg ti Kingdom Hall. Nasurok a 15 a tawen ti napalabasen, idi agtawen iti 28, nabaldado ni Walter manipud siket agingga iti sakana gapu iti aksidente iti kotse. Gapu ta nabaknang, addaan daytoy iti dua a guardia. Idi napalubosan ni Abigayl a makisarita ken Walter, inlawlawag dagiti nagannak ni Abigayl a kayat ti balasitangda ti mangted iti imbitasion kenkuana.

Iti ngudo ti pannakisaritana, kinuna ni Abigayl: “Adu ti inawis dagiti kakaduami idiay Kingdom Hall. Siak laeng ti maymaysa ti inawisna. Isu a no dika umay, siak laeng ti awan naawisna. Ngem no umayka, maragsakanak unay, ket ad-adda pay a maragsakan ni Jehova.”

Idi aldaw ti Memorial, agdaldalus dagiti Saksi agraman ni Abigayl idiay Kingdom Hall kas panagsagana iti programa iti rabii ti Memorial. Limmabas ni Walter iti dayta a malem, ket idi nakitana ni Abigayl, imbagana iti drayberna nga isardengna ti kotse. Naglukat ti tawa ti kotse, ket dinamagna ken Abigayl no ania ti ar-aramidenna. Imbagana a daldalusanda ti pasilio tapno napintasto agpaay kenkuana.

Magagaran ni Abigayl iti dayta a rabii. Nangrugin ti palawag, ket kanayon a tumaliaw tapno kitaenna no dimmar-ay ni Walter. Pagammuan ta dimteng ni Walter agraman dagiti guardiana. Kasta unay ti isem ni Abigayl. Kalpasan ti palawag, inamin ni Walter nga adda koma papananna ngem nagbaliw ti panunotna ket tinabunuanna ti Memorial gapu ken Abigayl. Kinunana pay: “Talaga a naintiempuan kaniak ti palawag.” Nagkiddaw iti Biblia ket rinugianna ti nagadal ken timmabuno kadagiti gimong.

Kabayatanna, ti babai a kabsat ni Walter kayatna a maam-ammo ni Abigayl, a kanayon a dakdakamaten ti kabsatna. Idi naam-ammona, naragsakan ta nagsingpet gayam nga ubing ni Abigayl. “Ita ammokon no apay a nakaragragsak ti kabsatko,” kinunana.

Agtultuloy a makipagad-adal ni Walter ken kanayon a makigimong. Agkomkomento pay ken iranranudna dagiti maad-adalna. Sigurado a ti ubing a ni Abigayl ipalagipna kadatayo ti balasitang nga Israelita a timmulong ken Naaman tapno maam-ammona ti pudno a Dios a ni Jehova.​—2 Ar-ari 5:2-14.