Am-ammom Kadi ti Nailangitan nga Amam?

AM-AMMOM kadi unay ni tatangmo? Mabalin a kasla karkarna dayta a saludsod no dimmakkelka iti nadungngo a pamilia. Mabalin nga isungbatmo: ‘Siempre, am-ammok unay!’ Wen, ammo ti kaaduan a tattao dagiti kayat ken saan a kayat ni tatangda, no kasano ti reaksionna iti dadduma a kasasaad, ken no kasano ti pannakaseknanna iti pamiliada.

Ngem nalabit adda dagiti gundaway a masdaawka a makakita iti naiduma unay a reaksion ni tatangmo. Kas pagarigan, mabalin a pagaammo ti maysa nga anak a kalmado ken di maun-uni ni tatangna. Ngem pagammuan ta saan metten a kasta ti makitana idi dimteng ti kasasaad a masapul a salakniban ni tatangna ti pamiliada.

Kasano ngay met ti kauneg ti pannakaammom iti Namarsua kadatayo? Maipapan kenkuana, kastoy ti naibaga kadatayo: “Babaen kenkuana addaantayo ti biag ken aggunaytayo ken addatayo.” (Aramid 17:28) Utangtayo iti Dios ti biagtayo ket iti dayta nga anag nga isu ti Ama dagiti amin a sibibiag. (Isaias 64:8) Nalabit a kasta ti panagriknam maipapan iti Dios ket maiparbeng laeng a kasta. Ngem nagadu pay ti maammuantayo maipapan kenkuana a pagimbagan ken pakaragsakantayo.

Ti riknam agraman ti panagraemmo ken tatangmo ket agpannuray iti kaadu ti pannakaammom maipapan kenkuana. Umasping iti dayta, no ad-adu ti ammom maipapan iti Dios, agbalinka a nasingsinged kenkuana. Matulongannaka ti Dios a mangibtur kadagiti pakasuotam ken pakarigatam iti biag no am-ammuem a naimbag ti maipapan kenkuana ken sursuruem nga aramiden ti pagayatanna.

Ania a kita a persona ti Dios? Ania ti rumbeng nga epekto kenka dagiti galadna? Adda kadi responsabilidad a kakuykuyog ti panangam-ammom kenkuana? Masungbatan dagita iti sumaruno nga artikulo.

[Blurb iti panid 3]

Ti kaadu ti pannakaammom maipapan iti sabsabali apektaranna ti riknam kadakuada