No Kasanom a Tarusan ti Biblia
2. Agbasaka Buyogen ti Silulukat a Panunot
Adda kadin gayyemmo a nangibaga iti agkakadakes maipapan iti maysa a dimo pay pulos naam-ammo? Idi naam-ammomon dayta a tao, saanmo kadin a makita dagiti saguday ken agkakaimbag a galadna gapu iti imbaga ti gayyemmo? Mabalin a kasta met ti mapasamak no maipapan iti Biblia.
IMPAKDAAR ni apostol Pablo ti mabalin a mapasamak no agbasatayo iti Biblia a saan a silulukat ti panunottayo. Maipapan iti sumagmamano a Judio idi kaaldawanna, insurat ni Pablo: “Saksiak ida nga adda regtada iti Dios; ngem saan a maitunos iti umiso a pannakaammo.”—Roma 10:2.
Ti dadduma a Judio idi umuna a siglo dida kayat nga akseptaren ti kinapudno a silalawag nga impalgak ti Hebreo a Kasuratan: ti kinasiasino ti Mesias. Nakita ken Jesus a taga-Nazaret ti amin a pagilasinan ti Mesias a dinakamat ti Hebreo a Kasuratan ken tinungpalna ti tunggal padto maipapan iti aramiden ti Mesias. Ngem adu a kailianna ti saan a nakatarus iti Sao ti Dios gapu iti dati a kapanunotanda a didan kayat a baliwan.
Ania ti masursurotayo iti dayta a salaysay ti Biblia? Nasken a basaentay ti Biblia buyogen ti silulukat a panunot. Ti panangidumduma wenno personal nga opinion ti agbasbasa ti mabalin a mangkullaap iti panunotna, isu a dina matarusan ti kinapudno nga isursuro ti Biblia.
Kas pagarigan, ti maysa a propesor iti panangadal kadagiti relihion idiay North Carolina, E.U.A., dineskribirna ti Biblia kas “gapuanan ti tao ken naglaon kadagiti kapanunotan ti tattao, nga adu kadagita ti agsusupadi ken di makaipaay iti umiso a giya no kasano ti rumbeng a panagbiagtayo.” No ti maysa nga agbasa iti Biblia ibilangna dayta kas “gapuanan ti tao,” dinto ngata agannayas a mangilaksid iti panangiwanwan wenno prinsipio a dina magustuan?
Maisupadi iti dayta, parparegtaennatayo ti Biblia a siaanep nga adalentayo dayta. Maipapan kadagiti taga-Berea idi kaaldawan ni Pablo, kuna ti Biblia: “Inawatda ti sao buyogen ti napalalo unay a kinagagar ti panunot, a siaannad a suksukimatenda ti Kasuratan iti inaldaw no agpayso dagitoy a banag.” (Aramid 17:11) Kas kadagidiay nga agbasbasa, nasken nga iwaksim ti aniaman a panangidumduma wenno panangkritikar a mabalin a mangkullaap iti pannakaawatmo. Basaem ti Sao ti Dios buyogen ti silulukat a panunot ken sigagagar nga ammuem ti makaparagsak unay a mensahe ti Autorna.