Kinapanglaw​—Pagilasinan Kadi ti Kinaawan Pamendision ti Dios?

KINUNA ti Dios kadagiti Israelita idi un-unana: “Awan ti rebbeng nga agbalin a napanglaw iti tengngam.” Apay? Iti ngamin Linteg nga intedna kadakuada, adda dagiti bilin no kasano ti panangasikaso kadagiti napanglaw ken no kasano ti pannakakanselar dagiti utangda. (Deuteronomio 15:1-4, 7-10) Ngarud, awan koma ti napanglaw kadagiti Israelita ta inkari ni Jehova a bendisionanna ida. Ngem dayta a bendision ket agpannuray iti panagtulnogda iti Linteg, banag a dida naaramidan.

Nupay kasta, di kaipapanan dayta a dagidiay napanglaw ket saan a bembendisionan ti Dios, no kasano a dagidiay nabaknang dina met kaipapanan a bembendisionan ida ti Dios. Idi un-unana, napanglaw ti adu kadagiti matalek nga agserserbi iti Dios. Ni propeta Amos ket nanumo nga agtartaraken iti karnero ken mangmangged no panagkekeddel iti higos. (Amos 1:1; 7:14) Idi panawen ni propeta Elias, adda dimteng a bisin iti Israel. Kapilitan a nagpannuray ni Elias iti kinamanagpadagus ti maysa a napanglaw a balo. Kabayatan ti bisin, simimilagro a saan a naibus ti bassit nga arina ken lana nga abasto ti balo. Saan a bimmaknang ni Elias wenno ti balo ngem impaayan ida ni Jehova kadagiti kangrunaan a kasapulanda.​—1 Ar-ari 17:8-16.

Gapu kadagiti di mapakpakadaan a pasamak, mabalin a kellaat a pumanglaw dagiti tattao. No maaksidente wenno agsakit ti maysa, mabalin a temporario wenno permanente a din makatrabaho. Adu met ti maulila ken mabalo gapu ken patay. Ngem di ipasimudaag dagita a nakas-ang a kasasaad a dagidiay agpaspasar kadagita ket saan a bembendisionan ti Dios. Makatukay a pagarigan ti kapadasan da Noemi ken Ruth maipapan iti naayat a pannakaseknan ni Jehova kadagiti nakurapay. Nupay pimmanglawda idi agpadadan a nabalo, binendisionan ida ni Jehova a Dios ken impaayna dagiti kasapulanda.​—Ruth 1:1-6; 2:2-12; 4:13-17.

Nalawag a ti kinapanglaw ket saan a pagilasinan ti kinaawan pamendision ti Dios. Dagidiay matalek ken Jehova a Dios mainanamada a pumayso kadakuada ti kinuna ni Ari David: “Maysaak idi nga agtutubo, kasta met a limmakayakon, ket kaskasdi a saanak a nakakita iti asinoman a nalinteg a naan-anay a nabaybay-an, wenno uray dagiti putotna nga agsapsapul iti tinapay.”​—Salmo 37:25.

[Ladawan iti panid 8]

Nupay napanglaw ken nakurapay da Noemi ken Ruth, binendisionan ken sidudungngo nga inaywanan ida ti Dios