Sekreto 2
Saanmo nga Idilig ta Bagim iti Sabsabali
ANIA TI ISURSURO TI BIBLIA? “Masapul nga usigen ti tunggal maysa ti bukodna nga aramid. No naimbag, mabalinna a pagpannakkel ti gapuananna. Saan a masapul nga idiligna ti gapuananna iti gapuanan ti sabali a tao.”—Galacia 6:4, Ti Baro a Naimbag a Damag Biblia.
ANIA TI KARIT? Nalabit kayattayo nga idilig ti bagitayo iti sabsabali—no dadduma kadagiti basbassit ti ik-ikutanda, ngem masansan kadagiti napigpigsa, nabakbaknang, wenno nalalaing ngem datayo. Aniaman kadagita ti pangidiligantayo iti bagitayo, agpada a di nasayaat ti epektona. Pagarupentayo a ti pateg ti maysa a tao agpannuray iti sanikuana wenno ti kabaelanna nga aramiden. Mangpatanor met dayta iti apal ken pannakisalisal.—Eclesiastes 4:4.
ANIA TI MABALINMO NGA ARAMIDEN? Ikagumaam a matmatan ti bagim kas iti panangmatmat ti Dios kenka. Ibasarmo koma ti pategmo iti panangmatmatna. “Ti maysa laeng a tao kitaenna no ania ti agparang kadagiti mata; ngem no maipapan ken Jehova,a kitaenna no ania ti puso.” (1 Samuel 16:7) Ni Jehova gantingenna ti pategtayo, saan a babaen iti panangidiligna kadatayo iti sabsabali no di ket babaen ti panangbasana iti pusotayo, a sukimatenna dagiti pampanunot, rikrikna, panagemtayo. (Hebreo 4:12, 13) Maawatan ni Jehova dagiti limitasiontayo ket idagadagna nga ikabilangantayo dayta. No rukodem ti pategmo babaen ti panangidiligmo iti bagim iti sabsabali, agbalinka laeng a natangsit wenno pulos a di kontento. Gapuna, sipapakumbaba nga awatem a saan a mabalin nga agballigika iti amin a gandatmo.—Proverbio 11:2.
Ania ngarud ti masapul nga aramidem tapno agbalinka a napateg iti imatang ti Dios? Pinaltiinganna ni mammadto a Mikias nga agsurat: “Imbagana kenka, O naindagaan a tao, no ania ti naimbag. Ket ania ti kidkiddawen kenka ni Jehova no di ti panangwatwat iti kinahustisia ken panangayat iti kinamanangngaasi ken panagbalin a naemma iti pannakipagna iti Diosmo?” (Mikias 6:8) No surotem dayta a balakad, aywanannaka ti Dios. (1 Pedro 5:6, 7) Adda pay kadi nasaysayaat a rason tapno agbalinka a kontento?
[Footnote]
a Nagan ti Dios a mabasa iti Biblia.
[Ladawan iti panid 5]
Ti pategtayo ken ni Jehova agpannuray iti pusotayo