MALAGIPYO KADI?

Binasayo kadi a naimbag dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

Kaano a “nangasaba [ni Jesus] kadagiti espiritu a sibabalud”? (1 Ped. 3:19)

Agparang a kalpasan ti panagungar ni Jesus, impakaammona kadagiti dakes nga espiritu ti nainkalintegan a pannusa a lak-amendanto.​—6/15, panid 23.

Ania dagiti tallo a problema a pakaipaspasanguan dagiti nakiasawa manen?

Isu dagitoy: panangikompara iti immuna nga asawada iti agdama nga asawada; pannakilangen kadagiti dati a gagayyem a saan unay a makaam-ammo iti baro nga asawada; panagtalek iti baro nga asawada gapu ta di matalek ti immuna nga asawada.​—7/1, panid 9-10.

Kaano nga ukomen ni Jesus dagiti tattao kas karnero wenno kalding? (Mat. 25:32)

Inton umay ni Jesus a mangukom kadagiti tattao bayat ti dakkel a rigat, kalpasan a madadael ti palso a relihion.​—7/15, panid 6.

Kaano nga agsangit ken agngaretnget dagiti nakillo a nadakamat iti pangngarig maipapan kadagiti trigo ken dakes a ruot? (Mat. 13:36, 41, 42)

Bayat ti dakkel a rigat inton maamirisda a saandan a maliklikan ti pannakadadaelda.​—7/15, panid 13.

Kaano a natungpal ti sasao ni Jesus maipapan iti matalek ken masirib nga adipen? (Mat. 24:45-47)

Nangrugi a natungpal dayta, saan nga idi Pentecostes 33 C.E., no di ket kalpasan ti 1914. Idi 1919, nadutokan ti adipen a mangaywan kadagiti katulong ti sangakabbalayan, a pakairamanan ti amin a Kristiano a matartaraonan iti naespirituan.​—7/15, panid 21-23.

Kaano a dutokan ni Jesus ti matalek nga adipen a mangaywan kadagiti amin a sanikuana?

Iti pay laeng masanguanan, bayat ti dakkel a rigat inton awaten ti matalek nga adipen ti nailangitan a gunggona.​—7/15, panid 25.

Kaipapananna kadi a dakes wenno saan a napateg ti dadduma a karakter iti Biblia gapu ta saan a nadakamat ti naganda?

Saan. Agpada nga adda dagiti naimbag ken dakes a tattao a di nainaganan iti Biblia. (Ruth 4:1-3; Mat. 26:18) Dua laeng kadagiti matalek nga anghel ti nadakamat ti naganda iti Biblia.​—8/1, panid 10.

Malaksid iti pannakabalin manipud iti Dios, ania ti nakatulong kadagiti 230 a Saksi tapno malasatanda ti nawatiwat a martsa manipud kampo konsentrasion iti Sachsenhausen?

Nupay kimmapsutda gapu iti bisin ken sakit, intultuloyda ti nagpipinnabileg tapno makapagtultuloyda a magna.​—8/15, panid 18.

Apay a makapabileg kadatayo ti salaysay maipapan iti ibaballasiw dagiti Israelita iti Karayan Jordan nga agturong iti Naikari a Daga?

Nupay agliplipias idi ti danum ti karayan, pinagsardeng ni Jehova ti ayusna tapno makaballasiw ti ilina. Napabileg la ketdi ti pammati ken panagtalekda kenkuana gapu iti dayta, ket mapabilegtayo met iti daytoy a salaysay.​—9/15, panid 16.

Ania ti nabatad maipapan iti masansan a panangdakamat ti Biblia kadagiti kolor?

Ti panangusar ti Biblia kadagiti kolor ipakpakitana nga ammo ti Dios ti epekto ti kolor iti emosion ti tao ken iti pananglagip kadagiti bambanag.​—10/1, panid 14-15.

Kasano a matungtungpal ita ti padto iti Mikias 5:5 maipapan kadagiti duke ken papastor?

Naammuantayo a ti ‘pito a pastor ken walo a duke’ iti Mikias 5:5 ket tumukoy kadagiti nadutokan a panglakayen iti kongregasion, a mangpabpabileg iti ili ti Dios tapno makapagsaganada iti naipadto nga iraraut.​—11/15, panid 20.

Ania ti sumagmamano a rason no apay a kasapulantayo ti Dios?

Kasapulantayo ti nasayaat a panangiwanwan ken solusion iti problematayo, nga agpada nga ipapaay ti Dios. Tulongannatayo met a maaddaan iti nasayaat ken naragsak a biag, ken tungpalennanto dagiti karina a nailanad iti Saona tapno maibanagna dagita.​—12/1, panid 4-6.