Naballigi a Pannakiraman iti Makaispal-Biag a Ministeriotayo
Imbagaybagay ni apostol Pablo ti presentasionna mainaig iti naimbag a damag tapno ‘iti amin a pamay-an maisalakanna ti sumagmamano.’ (1 Cor. 9:19-23) Umasping iti dayta, ad-adda nga agballigitayo iti ministerio no nalaingtayo a mangsiput iti paginteresan ti bumalay ken sisasaganatayo a mangbaliw iti pagsasaritaan sigun iti maibagay kenkuana.
2 Kalpasan a nakiam-ammokayo, mabalin a kastoy ti anag ti introduksionyo:
◼“Maupay ti adu a tattao gapu ta di kabaelan dagiti gobierno ti lubong a risuten dagiti agdama a parikuttayo. Iti panagkunayo, adda kadi gobierno a naan-anay a makaipaay iti amin a kasapulantayo? [Bay-an a sumungbat.] Ammoyo kadi nga adda mapagtalkan a kari maipapan iti maysa a gobierno a sigurado a mangikkat iti amin a parikut a mapaspasarantayo?” Imdenganyo a naimbag ti sungbat ti bumalay. Depende iti komentona, aramatenyo ti maysa kadagiti sumagmamano a presentasion nga insaganayo.
3 No ipasimudaag ti bumalay nga isu ket maysa a Kristiano, mabalintay a saludsoden no karkararagenna met laeng ti “Amami.” No wen ti sungbatna, mabalintay a basaen ti modelo a kararag agingga kadagiti sasao nga, “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.” (Mat. 6:9, 10) Pammaneknek daytoy a maibanagto ti pagayatan ni Jehova ditoy daga. Kalpasanna, dakamaten ti aniaman a maitutop nga artikulo iti Pagwanawanan wenno Agriingkayo! wenno iti panid 12 ti Ania ti Kalikaguman ti Dios Kadatayo?
4 No kasla mapnek ti bumalay iti agdama a kasasaad ti biagna, mabalinyo a saludsoden:
◼ “Apay a nasken nga usigentay a naimbag no ania ti ibagbaga ti Biblia maipapan iti masakbayan ti gobierno?” Kalpasanna, mabalintayo nga usaren ti impormasion a masarakan iti libro a Panakirinnason iti panid 157 ken 158, a tukoyen iti apagbiit ti maysa wenno nasursurok pay kadagiti walo a rason a nadakamat sadiay. No aginteres ti bumalay, usarenyo ti tract a Makalasatto Aya Daytoy a Lubong?, mangrugi iti umuna a parapo iti panid 2.
5 Saanto a naan-anay a naballigi ti damo a pannakisaritayo no diyo paggagaren ti bumalay para iti sumaruno nga isasarungkaryo. No kasta, siguraduenyo ti mangibati iti mamagpanunot a saludsod ket ikari a sungbatanyo intono agsublikayo.
6 Kadagiti presentasion a nadakamat, pilienyo ti mariknayo a maitutop a sawenyo. Ibagayyo dagitoy a singasing iti teritoriayo. Adalenyo dagiti broshur, tract, ken artikulo ti magasin nga usarenyo tapno nalakayo nga ibagay ti pannakisaritayo iti paginteresan ti bumalay. Sapay koma ta ipasnektay amin nga isagana dagiti presentasiontayo “maigapu iti naimbag a damag” ket iti kasta, naballigi ti pannakiramantayo iti daytoy makaispal-biag a ministerio.—1 Cor. 9:23.