Dagiti Pamilia a Natibker iti Naespirituan—Kasano?
1 Makomendaran dagiti Kristiano a pamilia a ‘mangan-annurot iti nadiosan a debosion iti bukodda a sangakabbalayan.’ (1 Tim. 5:4) Nupay kasta, gapu kadagiti nagadu a dakes nga impluensia iti aglawlawtayo a mabalin a mangpakapuy iti pammatitayo, nasken a pagreggetan dagiti pamilia nga agtalinaed a natibker iti naespirituan. Kasano a maaramidan daytoy?
2 Tuladenyo ti Kas ken Kristo a Kinaulo: Dagiti ulo ti pamilia nasken a tuladenda ni Jesu-Kristo iti wagas a panangibaklayda iti responsabilidadda tapno mapabileg dagiti sangakabbalayanda. Malaksid iti panangiparangarang ni Jesus iti ayatna kadatayo babaen ti sakripisio nga ipapatay, agtultuloy a “taraonan ken ipatpategna” ti kongregasion. (Efe. 5:25-29) Sursuroten dagiti naayat a nagannak daytoy nga ulidan ti nadungngo a panangaywan babaen ti panangasikasoda iti inaldaw a naespirituan a kasapulan ti pamiliada. Ramanen daytoy ti linawas a panangikondukta iti sangapamiliaan a panagadal iti Biblia, makagunggona a panagsasarita maipapan kadagiti naespirituan a banag aginggat’ mabalin, ken panangtaming kadagiti tumaud a parikut.—Deut. 6:6, 7.
3 Iti Tay-ak ti Ministerio: Rumbeng a bigbigen ti amin a miembro ti pamilia a ti panangasaba iti sabsabali maipapan ken ni Jehova ken kadagiti panggepna ket napateg a paset ti panagdayawda. (Isa. 43:10-12) Dakayo a nagannak, no kayatyo nga agbalin a matalek a Saksi ni Jehova dagiti annakyo, masapul a rugianyo a nasapa nga isagana ti pusoda iti ministerio. Ilawlawagyo dagiti makagapu no apay a kasapulan ti panagsakripisio iti panagserbi ken pannakiraman iti dayta tunggal lawas. (Mat. 22:37-39) Kalpasanna, mangaramidkayo iti urnos tapno regular a maikuyogyo ida iti tay-ak ti ministerio.
4 Tulonganyo ti pamiliayo a mangbigbig iti kinapateg ti trabaho a panangasaba babaen ti panangiwayayo iti tiempo kabayatan ti linawas a sangapamiliaan a panagadalyo nga agsagana ken agensayo iti epektibo a presentasion. Sanayenyo iti ministerio ti tunggal maysa kadagiti annakyo, a tulonganyo ida a rumang-ay sigun iti edad ken abilidadda. Kalpasan ti panangasabayo nga agkakadua, pagsasaritaanyo no kasano a nakitada a mismo ti kinaimbag ni Jehova. Isalaysayyo dagiti makapabileg-pammati a kapadasan. No ad-adda a ‘naramanan [dagiti pamilia] a ti Apo manangngaasi,’ ad-adda a sumingedda ken Jehova, a pabilgenna ida a mangsaranget iti “isuamin a kinadakes.”—1 Ped. 2:1-3.
5 Kadagiti Gimong: Anian a nagsayaat no agtitinnulong ti amin a miembro ti pamilia a tumabuno iti amin a gimong ti kongregasion, nangnangruna no ti maysa kadakuada ket nabannog, maup-upay, wenno maburiboran! “Nabannog ni tatangko no sumangpet a naggapu iti trabaho,” kuna ti maysa nga agtutubo a babai. “Ngem iranudko kenkuana ti maysa a nagsayaat a punto a mapagsasaritaan iti gimong iti dayta a rabii, ket dayta ti mangparegta kenkuana a mapan. Ket no siak met ti nabannog, paregtaennak a mapan.”—Heb. 10:24, 25.
6 Agtitinnulong a Mangaramid iti Bambanag: Agtitinnulong koma dagiti pamilia a mangaramid iti bambanag, kas kadagiti trabaho iti balay. Iwayaanyo met koma ti panawen para iti maitutop a paglinglingayan. Dagiti panagpiknik, hiking, panagay-ayam, ken panagpasiar kadagiti kabagian wenno gagayyem ket makaipaay iti gundaway a maaddaan kadagiti naragsak a kanito ken nakaay-ayat a pakalaglagipan.—Ecl. 3:4.
7 Mapagballigian dagiti nabileg a Kristiano a pamilia dagiti inaldaw a tubeng iti espiritualidadda. Babaen ti ad-adda nga iyaadani ken Jehova, mariknada ti bileg nga ipaayna.—Efe. 6:10.