Ti Pammatitayo Tignayennatayo nga Agaramid iti Naimbag
1 Pammati ti nangtignay kada Noe, Moises, ken Rahab. Binangon ni Noe ti daong. Tinallikudan ni Moises dagiti temporario a pagnam-ayan iti biag iti sangakabbalayan ni Faraon. Inlemmeng ni Rahab dagiti espia ket kalpasanna tinungpalna dagiti bilinda, a nakaispalan ti sangakabbalayanna. (Heb. 11:7, 24-26, 31) Ania dagiti naimbag nga aramid a patauden ti pammatitayo ita?
2 Panangasaba: Ti pammati tignayennatayo nga agsao maipapan iti nakaskasdaaw a Diostayo ken dagiti probisionna agpaay iti agnanayon a kinaragsak. (2 Cor. 4:13) No dadduma, mabalin a bumdengtayo a mangasaba. Ngem no ‘isaadtayo ni Jehova iti sanguanantayo a patinayon,’ mapabilegtayo ken mapukaw ti butengtayo. (Sal. 16:8) Iti kasta, tignayennatayo ti pammatitayo a mangiranud iti naimbag a damag kadagiti kakabagian, kaarruba, katrabahuan, kaeskuelaan, ken dadduma pay iti amin a maitutop a gundaway.—Roma 1:14-16.
3 Pannakigimong: Ti regular nga itatabuno iti gimong ket sabali pay a naimbag nga aramid a nagtaud iti pammati. Kasano? Ipakita dayta a napigsa ti pammatitayo nga adda ni Jesus kadatayo babaen ti nasantuan nga espiritu ti Dios no agtataripnongtayo kadagiti Nakristianuan a gimong. (Mat. 18:20) Iparangarangna ti tarigagaytayo a ‘dumngeg iti kunaen ti espiritu kadagiti kongregasion.’ (Apoc. 3:6) Ipangagtayo ti instruksion a maaw-awattayo gapu ta babaen ti pammatitayo ammotayo a ti mangisursuro kadatayo ket ti Naindaklan nga Instruktortayo, ni Jehova.—Isa. 30:20.
4 Dagiti Pangngeddeng nga Aramidentayo: Ti panagbalin a kombinsido unay kadagiti di makita a kinapudno tignayennatayo a mangyun-una kadagiti naespirituan a banag iti biagtayo. (Heb. 11:1) Masansan a ramanen daytoy ti panagsakripisio no maipapan kadagiti material a banag. Kas pagarigan, pinagkedkedan ti maysa a panglakayen ti gundawayna a rumang-ay iti material agsipud ta kaipapanan dayta a maliwayanna dagiti gimong, adayo iti pamiliana, ken agsardeng nga agpayunir. Agtalektayo koma met a naan-anay iti pammatalged ti Biblia nga ipaay ni Jehova ti kasapulan dagidiay ‘mangitultuloy . . . a mangsapul nga umuna ti pagarian ken ti kinalintegna.’—Mat. 6:33.
5 Ti nabileg nga impluensia ti pammati iti biagtayo ket mapalpaliiw dagiti sabsabali. Kinapudnona, agdinamag ti pammatitayo iti intero a daga. (Roma 1:8) Sapay koma ngarud ta iparangarangtayo babaen dagiti naimbag nga aramidtayo a nabiag ti pammatitayo.—Sant. 2:26.