Naitalek Kadatayo ti Naimbag a Damag
1 Pudno a naparaburantayo ta naitalek kadatayo ti naimbag a damag ti Dios! (1 Tes. 2:4) Nupay mabalin a laksiden dagiti dadduma daytoy nabileg a mensahe, dagiti nasingpet ti panagpuspusoda kaay-ayoda dayta a kas iti nabanglo nga ayamuom. (2 Cor. 2:14-16) Pannakaisalakan ti kaipapananna kadagidiay mangawat ken agtulnog iti naimbag a damag. (Roma 1:16) Ania ti rumbeng nga aramidentayo iti naimbag a damag a naitalek kadatayo?
2 Ni Jesus ken Dagiti Apostol: Impangpangruna idi ni Jesus ti panangiwaragawag iti naimbag a damag. (Luc. 4:18, 43) Uray no nabannog ken mabisin, natignay a mangiranud iti dayta kadagiti sabsabali gapu iti panagayatna kadagiti tattao ken panangipategna iti mensahe. (Mar. 6:30-34) Babaen iti sao ken aramid, intukitna iti panunot dagiti adalanna ti kinapateg ti trabaho a panangikasaba iti Pagarian.—Mat. 28:18-20; Mar. 13:10.
3 Kas panangtulad ken Jesus, sireregta nga impakaammo dagiti apostol ti mensahe ti Pagarian. Uray idi nakabkabil ken nabilinda nga isardengdan ti mangasaba, “nagtultuloyda nga awan sarday a mangisuro ken mangideklara iti naimbag a damag.” (Ara. 5:40-42) Inggaed ni apostol Pablo nga inaramid daytoy a trabaho. (1 Cor. 15:9, 10; Col. 1:29) Ti pribilehio a panangiranud iti naimbag a damag ket inyarigna iti utang iti padana a tao, ket madadaan a mangtallikud iti bukodna a pagnam-ayan tapno maitungpalna dayta.—Ara. 20:24; Roma 1:14-16.
4 Ti Pribilehiotayo Ita: Ti panangipateg iti sagrado nga annongen a naitalek kadatayo tignayennatayo a mangsapul kadagiti pamay-an tapno ad-adu ti magapuanantayo iti trabaho a panangasaba. (Roma 15:16) Naidalit ni Edward iti wheelchair. Bayat a situtugaw iti ruangan ti maysa nga hotel, isarsaritana kadagiti bisita ti maipapan iti pammatina. Ngem gapu ta kayatna nga ad-adu pay ti maaramidanna, nagpaaramid iti naisangsangayan a pagluganan a naikapet iti maysa a pickup truck, ket babaen iti daytoy a lugan, nagpayunir iti adu a tawen, a rinibu a kilometro ti dinaliasatna. Kas ken Edward, adu ita ti nangbalbaliw iti kasasaadda tapno ad-adu ti magapuananda a mangirakurak iti naimbag a damag.
5 Kas panangtulad ken ni Jesus ken kadagiti apostol, sapay koma ta kanayon nga ipangpangrunatayo iti biagtayo ti trabaho a panangasaba. No aramidentay dayta, maipakitatayo ti ayattayo kadagiti tattao ken ti panangipategtayo iti naimbag a damag a naitalek kadatayo.