Baro a Programa iti Aldaw ti Espesial nga Asamblea
Adu itan dagiti magun-odan nga impormasion maipapan iti panangtaginayon a nasalun-at ti literal a pusotayo tapno maaddaantayo iti naragragsak ken napapaut a biag. Napatpateg ti kasasaad ti piguratibo a pusotayo. Maitutop la unay ngarud ti tema ti programa iti aldaw ti espesial nga asamblea a mangrugi inton Pebrero 2004: “Panagserbi ken ni Jehova Buyogen ti Naan-anay a Puso.” (1 Cron. 28:9) Ania ti masursurotayonto?
Ilawlawag ti manangaywan iti sirkito ti tema a “Panangtulong Kadagiti Sabsabali nga Agserbi ken ni Jehova Buyogen ti Naragsak a Kararua.” Itampok dagiti interbiu no ania dagiti rag-o iti panangsukay iti interes ken panangyadal iti Biblia. Awan duadua a maliwliwa ken mapabileg dagiti dumngeg iti umuna a palawag ti bumisbisita nga ispiker a natemaan iti “Panangsaluad iti Pusotayo iti Nariribuk a Lubong.” Agngudo ti sesion iti agsapa babaen ti palawag iti bautismo.
Iti malem, ti paset a “Madadaankayo Koma a Tumulong” ilawlawagna no kasanotayo a matulongan dagiti sabsabali. Ania ti maaramidan dagiti nagannak tapno masalaknibanda ti puso dagiti annakda manipud kadagiti dakes nga impluensia ken tapno matulonganda ida nga umadani ken ni Jehova? Ti paset a “Tulonganyo Dagiti Annakyo nga Agrag-o ken Jehova” ipaayna dagiti praktikal a singasing ken iparangna no kasano a maaramid daytoy.
Gungundawayantayo kadi ti tunggal probision nga ipapaay ni Jehova tapno agtultuloy a nasalun-at ken nakired ti piguratibo a pusotayo? Ti maudi a palawag ti bumisbisita nga ispiker a natemaan iti “Salimetmetanyo ti Naan-anay a Puso iti Panagserbiyo ken ni Jehova,” ket naipamaysa iti uppat a napateg nga aspeto ti rutinatayo a panangtaginayon iti espiritualidadtayo. Mano nga oras ken pigsa ti busbusbosentayo iti napasnek a panagkararag, panagadal iti Sao ti Dios, naregta a panangasaba, ken pannakitimpuyog kadagiti padatayo a Kristiano? Adda pay kadi maaramidantayo tapno rumang-aytayo iti aniaman kadagitoy a benneg?
Iyaw-awis ni Jehova: “Iyegmo ta pusom iti disiplina ken ta lapayagmo iti sasao ti pannakaammo.” (Prov. 23:12) Iplanoyo itan a tabunuan daytoy makagunggona nga aldaw ti Nainkasuratan a pannakaisuro. No aramidenyo, mapabilegkayo nga agtultuloy nga agserbi ken ni Jehova buyogen ti naan-anay a puso.