Pannakiraman iti Ministerio kas Pamilia
1 Pakaidayawan ti nadayag a nagan ni Jehova ti dedikado a pamilia a naan-anay a makiramraman iti sagrado a serbisio—a ti ama, ina, ken dagiti annak ket amin-kararua nga agserserbida iti Dios. Maragsakantayo ta adu ti kasta a pamilia a masarakan kadagiti kongregasion dagiti adipen ni Jehova iti intero a daga.
2 Siempre, ti ama ti kangrunaan a makinresponsabilidad iti panangasikaso kadagiti naespirituan a kasapulan ti pamiliana. (1 Cor. 11:3) No makitinnulong ti asawa ken annakna, makaipaay ti pamiliana iti nasayaat nga impluensia kadagiti dadduma. (Mat. 5:16) Ania dagiti sumagmamano a benneg a mabalin a maiparangarang ti kastoy a panagtitinnulong?
3 Dagiti Nagannak ti Mangidaulo: Kaaduanna, ti ama ket mabalin a maysa a panglakayen wenno ministerial nga adipen. Kaipapanan daytoy a malaksid kadagiti kasapulan ti pamiliana, masapul nga ipaayanna iti panawen ken atension dagiti bambanag a mainaig iti kongregasion. Responsabilidad ti ama a bingaybingayen ti tiempona. Mabalin a saan a kanayon a nalaka daytoy gapu ta limitado ti tiempona. Ngem gapu ta ti pamiliana ti kangrunaan a responsabilidadna, masapul a kanayon nga adda eskediulna a makikadua iti pamiliana iti panagadal, iti panagserbi iti tay-ak, kadagiti gimong, ken iti maitutop a paglinglingayan. Mabalin a mabaliwan no dadduma ti eskediul ti ama, ngem anian a makagunggona no linawas a mangbusbos iti tiempo a makikadua iti pamiliana iti panagserbi iti tay-ak!
4 Napateg ti pannakitinnulong ti asawa a babai. Matulonganna ni lakayna iti kapatgan a wagas babaen ti pannakitinnulongna a mangsanay kadagiti annakda iti ministerio. Ti mapagwadan a regta ken debosionna ket dakkel ti epektona kadagiti annakda tapno rumayray ti apresasionda iti ministerio. Lagipenyo no kasano a ti ina ni Timoteo a ni Eunice ken ti apongna a baket a ni Loida sinanayda ni Timoteo iti ‘nasantuan a sursurat manipud kinamaladagana,’ uray no saan a manamati ti amana. (2 Tim. 3:14, 15) Mabalin a kalikaguman daytoy ti nabileg a pammati, napasnek a panagregget, ken panagsakripisio. Ngem nasupapakan daytoy idi rimmang-ay iti naespirituan ni Timoteo ken nagbalin a naregta a misionero.—Fil. 2:19-22.
5 Adu dagiti umasping nga ehemplo iti kaaldawantayo a ti maysa a manamati a nagannak ket sibaballigi a naitungpalna ti responsabilidadna iti naespirituan a mangsanay kadagiti annakna iti ministerio. Gapu iti nagsayaat nga ulidan ti ina wenno amada, adu nga agtutubo ti addaan iti nabileg a takder iti kinapudno ket, kas ken Timoteo, tagtagiragsakenda dagiti adu a pribilehio iti amin-tiempo a ministerio.
6 Wen, dagiti nagannak nasken a mangituyangda iti ulidan tapno maitukit kadagiti annakda ti pateg ti pannakaadda ti nasayaat nga eskediul iti regular a pannakiraman iti ministerio. Nasken a mangipasdek dagiti nagannak iti di agbalbaliw a linawas a rutina iti panagserbi ken surotenda dayta tapno ammo dagiti annak no ania a paset ti lawas ti kanayon a nailatang para iti trabaho a panangasaba.
7 Responsabilidad Dagiti Annak: Ania met ngay ti responsabilidad dagiti annak? Uray ti perpekto nga Anak ti Dios, a ni Jesus, ket nagtulnog iti bilin ken pannursuro dagiti dadakkelna. (Luc. 2:51) Gapuna, no iyurnos ti ama ken ina nga agkukuyogda a sangapamiliaan a mapan mangasaba, obligado dagiti annak a mangipakita iti nadiosan a debosionda babaen ti pannakitinnulongda kadagiti dadakkelda.—Efe. 6:1-3.
8 Ti panagdayaw a sangsangkamaysa kas pamilia babaen ti panagadal, pannakiraman iti ministerio iti tay-ak, ken pannakigimong patibkerenna ti singgalut ti ayat ken panagkaykaysa ti pamilia. Responsabilidad daytoy dagiti nagannak ken annak.