Saludsod

◼ Rumbeng kadi ti agkararag no mangyadaltayo iti Biblia iti ruangan?

Yantangay agduduma ti kasasaad, nasken a tingitingen ti mangyad-adal no rumbeng a mangikararag bayat ti panagadal iti Biblia iti ruangan. Ti maysa a banag nga ikabilangantayo ket ti maipapan iti estudiante. Kuna ti Abril 2005 a Ti Ministeriotayo iti Pagarian, panid 8: “Maitutop ngarud ti agkararag sakbay ken kalpasan ti panagadal. Kaaduanna, mabalintay nga aramiden daytoy iti damo a pannakipagadal kadatayo dagiti relihioso a tattao. Kadagiti dadduma, mabalin a nasken a tingitingentayo no kaano a mayanatup ti agkararag.”

Ti maysa pay a banag nga ikabilangantayo ket ti lugar a pagadalantayo. No awan ti makakitkita, mabalin a sitataktika nga agkararagtayo sakbay ken kalpasan ti panagadal. Ngem no adu ti makakitkita ken alusiisen ti estudiante, kasayaatan no aguraytayo agingga nga adda pribado a lugar a pagadalantayo sakbay nga iruangan ti panagkararag.

◼ Rumbeng kadi nga agdalungdong ti kabsat a babai no adda kaduana nga agibumbunannag a lalaki bayat ti panangyadal iti Biblia iti ruangan?

Wen. Nasken nga agdalungdong ti kabsat a babai no mangikondukta iti regular ken nakaeskediul a panagadal a kaduana ti maysa a lalaki nga agibumbunannag iti Pagarian. (1 Cor. 11:3-10) Aramidenna daytoy no mangyadal iti Biblia iti pagtaengan, iti ruangan, wenno iti sabali pay a lugar. Ilawlawag ti Hulio 15, 2002 a ruar Ti Pagwanawanan, panid 27: “Maysa daytoy a nasaksakbay a nayurnos a sesion ti panangisuro a ti mangikonkondukta iti panagadal ket kinapudnona, mangidadaulo. Ti kasta a panagadal ket agbalin nga ekstension ti kongregasion. No ti Saksi a babai ti mangidaulo iti kasta a panagadal ken adda kaduana a Saksi a lalaki, maiparbeng laeng nga agdalungdong ti babai.” Agaplikar met dayta no di bautisado a lalaki nga agibumbunannag iti Pagarian ti mangkadua kenkuana.

Iti sabali a bangir, no saan pay a naipasdek ti panagadal iti Biblia iti ruangan, saan a masapul nga agdalungdong ti babai no adda kaduana a lalaki nga agibumbunannag iti Pagarian uray no ti panggep ti panagsarungkar ket tapno maidemostra ti panagadal iti Biblia wenno ilawlawag ti material iti maysa kadagiti maisingasing a publikasion a maadal. Yantangay in-inut a maipasdek dagiti panagadal iti ruangan babaen ti sumagmamano a panagsarungkar, nasken nga ikabilangan dagiti agibumbunannag ti kasasaad ken nainkalinteganda koma a mangikeddeng no kaano nga agdalungdongda.