Siasino Dagiti Awisek?

Tinawen a kasta unay ti panangikagumaantayo a mangawis kadagiti tattao iti teritoriatayo tapno makikaduada kadatayo nga umatender iti Memorial. Ditay am-ammo ti kaaduan kadakuada. Masapul met nga awisentayo dagiti am-ammotayo. Masansan nga umatender dagidiay makaawat iti imbitasion manipud iti am-ammoda. (yb08 11 ¶3; 14 ¶1) Siasino ti dadduma a mabalinmo nga awisen?

• Dagiti kabagian

• Dagiti katrabahuan wenno kaeskuelaan

• Dagiti kaarruba

• Dagiti sarsarungkaran ken iyad-adalan iti Biblia idi ken ita

Awisen met dagiti panglakayen dagidiay di aktibo. Kasano no saanmo a kalugaran ti am-ammom? Maammuam ti oras ken pakaangayan ti Memorial iti lugar a pagnanaedanna no i-click-mo ti tab a MAIPAPAN KADAKAMI iti ngato ti home page ti jw.org, sa i-click-mo ti “Memorial.” Bayat nga agsagsaganaka nga umatender ita a tawen, panunotem dagidiay mabalinmo nga awisen, ken ikkam ida iti imbitasion.