Salsaludsod Dagiti Agbasbasa

Ti sapata ket “serioso unay, pormal a deklarasion wenno kari a mangaramid iti maysa a banag, a masansan a mangdakamat iti Dios . . . kas saksi.” Mabalin a maisao wenno maisurat dayta.

Baka panunoten ti dadduma a dakes ti agsapata gapu ta imbaga ni Jesus iti Mateo 5:33-37: “Nangngegyo pay a naikuna idi un-unana, ‘Dikay agsapata.’” Sa imbagana: “No kunayo a ‘Wen,’ wen; ngem no ‘Saan,’ saan; ta aniaman a surok dagita ket nagtaud iti daydiay managdakdakes.” Siempre, ammo ni Jesus nga adda dagiti sapata nga ipapaannurot ti Mosaiko a Linteg, ket kasta ti inaramid idi dagiti matalek nga adipen ti Dios. (Gen. 14:22, 23; Ex. 22:10, 11) Ammona met nga adda dagiti tiempo a nagsapata ni Jehova. (Heb. 6:13-17) Isu a saan a kayat a sawen ni Jesus a ditay pulos agsapata. Imbes ketdi, pakpakdaaranna dagiti tattao a dida agsapata iti awan patpategna wenno awan serserbina a bambanag. Masapul a kanayon a tungpalentayo ti inkaritayo. Dayta ti kayat ni Jehova nga aramidentayo.

Ania ngarud ti masapul nga aramidem no pagsapataendaka? Umuna, siguraduem a kayam nga aramiden ti insapatam. Ta no saan, nasaysayaat laengen a saanka nga agsapata. Ipakdaar ti Sao ti Dios: “Nasaysayaat a dika agkari ngem ti agkarika a dimo tungpalen.” (Ecl. 5:5) Sumaruno, panunotem dagiti prinsipio ti Biblia maipapan iti dayta a sapata, ken agtignayka maitunos iti konsiensiam a sinanay ti Biblia. Ania ti dadduma kadagita a prinsipio?

Dadduma a sapata ket maitunos iti pagayatan ti Dios. Kas pagarigan, agkinnari dagiti Saksi ni Jehova no agkasarda. Dagitoy a kari ket maysa a klase ti sapata. Iti sanguanan ti Dios ken dagiti saksi, agkinnari ti nobio ken ti nobia nga aginnayat, agpinnateg, ken agrinnaemda “bayat a sibibiag[da] a dua.” (Mabalin a saan a kasta ti eksakto nga ibaga ti dadduma nga agkasar, ngem agkinnarida latta iti sanguanan ti Dios.) Kalpasanna, mayam-ammodan kas agassawa, ken inggat’ tungpal biagda ti panagasawada. (Gen. 2:24; 1 Cor. 7:39) Dayta a panagsinnapata ket umiso, maitutop, ken maitunos iti pagayatan ti Dios.

Dadduma a sapata ket maikontra iti pagayatan ti Dios. Ti maysa a pudno a Kristiano ket saan a mangaramid iti kasta a sapata tapno idepensana ti maysa a pagilian babaen ti armas wenno tapno tallikudanna ti pammatina iti Dios. No aramidenna dayta, suksukirenna dagiti bilin ti Dios. Masapul a dagiti Kristiano ket ‘saan a paset ti lubong,’ isu a saantayo a makiraman iti aniaman a kontrobersia ken panaglalaban.—Juan 15:19; Isa. 2:4; Sant. 1:27.

Dadduma a sapata ket agdepende iti konsiensia. No dadduma, sakbay nga agdesisiontayo no agsapatatayo wenno saan, masapul a panunotentayo a naimbag ti balakad ni Jesus nga ‘ited ken Cesar dagiti kukua ni Cesar, ngem ited iti Dios dagiti kukua ti Dios.’—Luc. 20:25.

Kas pagarigan, ipapantayon a ti maysa a Kristiano ket agaplay iti citizenship wenno agala iti passport. Naammuanna a masapul nga agsapata iti oath of allegiance, wenno sapata ti panagtulnog ken panangsuportana iti pagilian a pagaplayanna iti citizenship. No iti dayta a pagilian, dayta a sapata kaipapananna nga ikarina nga agaramid iti banag a nalawag a maikontra iti linteg ti Dios, pagkedkedan dayta ti konsiensiana a sinanay ti Biblia. Ngem mabalin nga ipalubos ti gobierno a baliwanna ti sasao dayta a sapata tapno awaten ti konsiensiana.

Ti panagsapata iti oath of allegiance a nabaliwan ti sasaona ket mabalin a maitunos iti prinsipio iti Roma 13:1, a kunana: “Tunggal tao ket agpaituray koma kadagiti nangatngato nga autoridad.” Isu a para iti dayta a Kristiano, mabalin a saan a dakes ti panagsapata nga aramidenna ti banag nga imbilinen ti Dios nga aramiden ti maysa a tao.

Napateg met a surotem ti konsiensiam a sinanay ti Biblia no maibilin nga agusarka iti maysa a banag wenno adda posision ti imam bayat nga agsapsapataka. Dagiti nagkauna a Romano ken Escita nagsapatada babaen ti espadada. Kaipapanan dayta nga inusarda ti simbolo ti dios ti gubat kas garantia ti kinamatalek ti maysa a tao. Itayag met dagiti Griego ti maysa nga imada a nakaturong iti langit no agsapatada. Iti kasta, bigbigenda nga adda dios a mangob-obserbar iti maibagbaga ken maar-aramid ken manungsungbat kenkuana dagiti tattao.

Siempre, saan nga agsapata ti maysa nga adipen ni Jehova iti aniaman a simbolo ti pagilian nga adda koneksionna iti ulbod a relihion. Ngem no ngay ibaga ti korte nga iparabawmo ti imam iti Biblia ken agsapataka nga ibagam ti pudno? No kasta ti situasion, mabalinmo nga aramiden dayta. Ngamin, dinakamat ti Biblia nga adda dagiti matalek a tattao nga idi nagsapatada, adda posision ti imada. (Gen. 24:2, 3, 9; 47:29-31) Napateg a laglagipem a no mangaramidka iti kasta a sapata, agkarkarika iti imatang ti Dios nga ibagam ti kinapudno. Masapul a nakasaganaka tapno pudno ti maisungbatmo iti aniaman a maisaludsod kenka.

Ipatpategtayo ti relasiontayo ken Jehova. Masapul ngarud nga ikararag ken panunotentayo a naimbag ti aniaman a sapata a maipaaramid kadatayo. Siguraduentayo met a saan a maikontra dayta iti konsiensiatayo wenno kadagiti prinsipio ti Biblia. No agsapataka, masapul a siguraduem a matungpalmo dayta.—1 Ped. 2:12.