“Ipalubosyo a ti Talna ti Kristo ti Agari Kadagiti Pusoyo”

Ania “ti talna ti Kristo” a nadakamat iti Colosas 3:15? Tumukoy dayta iti talna a maadda iti maysa nga adalan ni Kristo. Marikriknatayo dayta a talna gapu ta ammotayo nga ay-ayatennatayo ni Jehova ken ti Anakna.—Juan 14:​23, 27.

Imparegta ni apostol Pablo kadagiti Kristiano iti kongregasion ti Colosas nga ipalubosda a ti talna ti Kristo ti agari iti pusoda wenno iti makin-uneg a kinataoda. Ania ti kayatna a sawen? Ti Griego a sao nga inusar ni Pablo para iti “agari” ket konektado iti maysa a referee. Ti ibaga ti referee ti masapul a masurot iti maysa nga ay-ayam. Kasta met, “ti talna ti Kristo” ti masapul a surotentayo no agdesisiontayo.

Kas pagarigan, no adda diyo nagkinnaawatan iti maysa a kabsat, kasanom a maipakita nga ipalpalubosmo a “ti talna ti Kristo” ti agari iti pusom wenno agbalin a “referee”? Masapul a saan a ti desision ti pusotayo ti masurot. Pakawanentayo ti kabsattayo. No aramidentayo dayta, ipalpalubostayo a “ti talna ti Kristo” ti agari iti pusotayo ken tumultulongtayo tapno agtalinaed ti talna ken panagkaykaysa iti kongregasion.—Col. 3:​12-14.