Napanunotyo Kadin?

Patienyo kadi nga ik-ikutan ti tao ti di matay a kararua a makalasat a sibibiag no matay ti bagi? Minilion, nalabit binilion, ti mamati a ti tao addaan iti kararua nga umakar iti sabali a lubong wenno kasasaad ti panagbiag inton matay wenno agbiag kas sabali a parsua. Ania ti kunaen ti Biblia maipapan iti kararua? Masarakanyo a maka-intriga ken makalawlawag dagitoy a saludsod. Maipaay iti sungbat, isingasingmi a sukimatenyo dagiti naisitar a kasuratan wenno kitaenyo ti panid 21.

 1. Naparsua kadi ni Adan idiay langit, wenno ditoy daga?—Genesis 1:26-28.

 2. Naparsua kadi ni Adan a matay, wenno di matay?—Genesis 2:15-17.

 3. No di koma simmukir ken nagbasol ni Adan, natay koma kadi?—Roma 6:23.

 4. Pinaneknekan kadi ti kurso ni Adan nga isu ket matay, wenno di matay?—Genesis 3:19; 5:5.

 5. Babaen iti basolna, napukaw kadi ni Adan ti pagtaengan a naindagaan, wenno ti nailangitan?—Genesis 1:26-28.

 6. No immay ni Jesus tapno isublina ti napukaw gapu iti panagbasol ni Adan, anianto ti maisubli?—Salmo 37:29; Roma 5:18, 19; Apocalipsis 21:1-4.

 7. Ni kadi Adan buklen ti dua a nagduma a paset, ti kararua ken ti bagi?—Genesis 2:7; 1 Corinto 15:45.

 8. No mamatikayo a ni Adan ket maysa a kararua ken maysa a bagi, ania a paset ti nagbasol, ti kararua wenno ti bagi?—Salmo 51:1-4.

 9. No ti sungbatyo ket, “Ti kararua,” apay a masapul nga agsagaba ti bagi?

10. No ti sungbatyo ket “Ti bagi,” apay a masapul nga isalakan ti kararua?

11. No makagteng ti tao idiay langit babaen ti ipapatay, saan kadi a paneknekan dayta a ti basol ken ipapatay ket bendision imbes a, kas kunaen ti Biblia, maysa a lunod?—Roma 5:12; 6:21-23.

12. Ania ti dusa a naipataw ken Adan gapu iti basolna—ipapatay, wenno agtultuloy nga agbiag iti maysa a lugar?—Genesis 2:16, 17; 3:19.

13. Adda kadi maysa a dusa para iti bagi ken sabali para iti kararua?—Eclesiastes 9:5, 10; Ezequiel 18:4.

14. Pinanunot kadi ti Dios ti agnanayon a pannakatutuok idiay impierno?—Jeremias 7:31.

15. Sigun ken Pablo, ania ti supapak ti basol?—Roma 6:23.

16. Dinakamat kadi ni Pablo ti agnanayon a pannakatutuok idiay impierno?—Roma 6:7.

17. No pudno nga adda impierno, apay ngarud nga agsagaba iti agnanayon ti tao tapno makabayad iti apagbiit laeng a panagbiagna iti basol? Nakapkapuy aya ti kinahustisia ti Dios ngem ti tao?—Roma 9:14.

18. Pinati kadi dagiti matalek a tattao idi ugma nga adda kararuada a napan idiay langit wenno idiay impierno?—Genesis 37:35; Salmo 89:48; Aramid 2:34.

19. Ania ti pudno a namnama dagiti natay?—Juan 5:28, 29; 11:23-26; Aramid 24:15.

20. No awan ti imortal a kararua, kasano a dadduma (144,000) makipagturayda ken Kristo idiay langit?—1 Corinto 15:42-49, 53, 54; Apocalipsis 14:1, 4; 20:4.a

Napanunotyo Kadin? Dagiti Sungbat ti Biblia

Dagiti sumaganad ti dadduma kadagiti teksto a naisitar kadagiti saludsod idiay panid 13:

 1. “Ket ti Dios pinarsuana ti tao a kaladawanna met laeng, . . . pinarsuana ida a lalaki ken babai. . . . Kinuna ti Dios kadakuada: ‘Agbungakayo ken agadukayo ken punnuenyo ti daga ken iturayanyo dayta.’”—Genesis 1:27, 28.

 2. “Kadagiti amin a kayo iti minuyongan mangankanto a siwayawaya. Ngem ti aggapu iti kayo ti pannakaammo ti imbag ken dakes saanmonto a kanen, ta iti aldaw a pannanganmo iti daydiay mataykanto a di bumurong.”—Genesis 2:16, 17.

 3. “Ta dagiti isupapak ti basol isu ti ipapatay, ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.”—Roma 6:23.

 4. “Babaen ti ling-et ti rupam mangankanto iti taraon agingga a dika agsubli iti daga, isu a nakabuklam. Ta tapukka ket iti tapuk agsublikanto.”—Genesis 3:19.

 5. Kitaenyo ti Blg. 1.

 6. “Adtoy! Ti tolda ti Dios adda iti sangatauan . . . Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”—Apocalipsis 21:3, 4.

 7. “Ket ni Jehova a Dios binukelna ti tao iti tapuk ti daga ket impuyotna iti agongna ti anges ti biag, ket ti tao nagbalin a kararua a sibibiag.” (Genesis 2:7) Ti sao a “kararua” ti patarus ti Hebreo a neʹphesh, “agang-anges.” “Ti umuna a tao, ni Adan, ket nagbalin a kararua, kas kunaen ti kasuratan.” Paliiwenyo, “nagbalin,” saan a “naikkan.”—1 Corinto 15:45, The Jerusalem Bible.

 8. “Ti basolko kanayon nga adda ditoy sanguanak. Maibusor kenka, kenka laeng, nakabasolak, ken nakaaramidak iti dakes iti imatangmo.”—Salmo 51:3, 4.

 9, 10. Din kasapulan dagiti teksto.

11. “Dayta ti makagapu a, no kasano a babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti isuamin a tattao agsipud ta nagbasolda amin.”—Roma 5:12.

12. Kitaenyo ti Blg. 4.

13. “Ta dagiti sibibiag ammoda a mataydanto; ngem dagiti natay dida ammo ti aniaman . . . Awan ti aramid wenno gakat wenno pannakaammo wenno sirib idiay Sheol, a papanam.” (Eclesiastes 9:5, 10) “Kas ti kararua ti ama kasta met ti kararua ti anak a lalaki—kukuak ida. Ti kararua nga agbasbasol—dayta a mismo matayto.”—Ezequiel 18:4.

14. “Binangonda dagiti nangato a disso ti Tofet . . . tapno puoranda dagiti annakda a lallaki ken babbai iti apuy, banag a saanko nga imbilin ken di met simnek iti pusok.”—Jeremias 7:31.

15. Kitaenyo ti Blg. 3.

16. “Ta ti natayen naluk-atanen manipud iti basolna.”—Roma 6:7.

17. “Anianto ti kunaentayo, ngarud? Adda aya di kinahustisia iti Dios? Saan koma a pulos agbalin a kasta!”—Roma 9:14.

18. “Iti kinaagpaysuanna ni David saan nga immuli iti langlangit.”—Aramid 2:34.

19. “Adda inanamak iti Dios, ti inanama nga ab-abrasaen met dagitoy a tattao, nga addanto panagungar agpadpada dagiti nalinteg ken dagiti nakillo.”—Aramid 24:15.

20. “Ta daytoy nga agrupsa masapul nga agkawes iti di panagrupsa, ket daytoy nga addaan ipapatay masapul nga agkawes iti kinaawan ipapatay.” No ti kinaawan ipapatay ket ‘ikawes,’ ngarud daytat’ saan a nainkasigudan. (1 Corinto 15:53) “Ket nakitak, ket, adtoy! ti Kordero nga agtaktakder iti Bantay Sion, ket kaduana ti sangagasut uppat a pulo ket uppat a ribo . . . Nagatang dagitoy manipud iti sangatauan kas umuna a bungbunga iti Dios ken iti Kordero.”—Apocalipsis 14:1, 4.

[Dagiti Footnote]