Ti Panangmatmat ti Biblia

Ti Mamagsinggalut nga Ayat

IDI 1978, maysa a napigsa a bagyo iti North Atlantic ti nangipallapallayog iti pangluho a lugan iti taaw a Queen Elizabeth 2. Dagiti dalluyon a kas iti kangato ti sangapulo-grado a pasdek ti nangablat iti barko, a nangpalned ken nangpatapaw iti dayta a kaslattay maysa a tapon. Naipuruak dagiti muebles ken pasahero bayat nga agkaralenned sa tumpaw ti lugan. Naimbag ta saan unay a grabe ti dunor dagiti 1,200 a pasahero. Ti nasayaat nga inhenieria, materiales, ken pannakasangal ti nanglapped iti pannakarba ti barko.

Adun a siglo ti napalabas, adda sabali a barko a naranaanna ti nagpigsa a bagyo. Nakalugan idi da apostol Pablo ken ti 275 a sabsabali. Tangay madanaganda di la ket ta marba ti barko gapu iti kinapigsa ti bagyo, dagiti marino ti nabatad a nagusar ‘kadagiti pangtulong’—kadena wenno tali—iti babaen ti barko manipud maysa a sikigan agingga iti sabali tapno mangtengngel kadagiti tabla a nangbukel iti kaha daytoy a barko dagiti negosiante. Naispal amin a pasahero ti lugan, nupay nadadael ti barko.—Aramid, kapitulo 27.

Mabalin a dagiti pakasuotan iti biagtayo ti mangiparikna a kaslattay addatayo iti barko [nga aglaylayag] iti nadawel a baybay. Dagiti dalluyon ti panagdanag, pannakapaay, ken panagleddaang ti mangablat kadatayo, a mangsubok iti pagpatinggaan ti ayattayo. Tapno madaeran dagita a bagyo ken maliklikan ti pannakarba, kasapulantayo met ti sumagmamano a katulongan.

No Dumteng Dagiti Bagyo

Nagsayaat ti pannakaisurat ti pammati ken panagibtur ni apostol Pablo iti Biblia. Nagbannog maigapu kadagiti immuna a kongregasion Kristiano. (2 Corinto 11:24-28) Dagiti gapuananna iti trabaho ti Apo ti mangted iti nalawag a testimonia iti nasged nga ayatna kadagiti kaarrubana ken ti napigsa a relasionna iti Dios. Ngem, saan a kanayon idi a naannayas ti panaglayag ti biag ni Pablo. Agpadpada a literal ken piguratibo a dinaeran ni Pablo ti adu a bagyo.

Idi kaaldawan ni Pablo, no masabet ti barko ti nadawel a bagyo, agpannuray ti pannakailasat dagiti pasahero ken ti barko iti kinabatido dagiti marino ken iti kinalagda ti barko. Pudno met daytoy idi naipasango ti apostol kadagiti piguratibo a bagyo. Nupay nadaeran ni Pablo ti pannakaparigat ti bagi, pannakaibalud, ken pannakatutuok, nagtaud iti uneg ti kongregasion Kristiano ti kakaruan a bagyo a nangkarit iti espiritual ken emosional a kinatibkerna ken ti abilidadna nga agtultuloy nga agayat.

Kas pagarigan, nagtultuloy a nagbannog ni Pablo iti makatawen ket kagudua tapno maipasdek ti kongregasion iti siudad ti Corinto. Dagiti kapadasanna kadagiti taga Corinto ti nakapatanoranna iti nasged a rikna para iti arban. Nasao pay ketdi ni Pablo ti bagina a kaslattay maysa nga ama kadakuada. (1 Corinto 4:15) Ngem, agpapan iti rekord ti ayat ken panagbannogna maigapu iti kongregasion, dadduma idiay Corinto ti nagsao iti maikontra ken Pablo. (2 Corinto 10:10) No utoben amin nga inaramidna a panagsakripisio iti bagi, ania ketdin a makapaupay daydi!

Apay metten a nagbalin a naulpit ken manangirurumen dagidiay nga immawat iti awan keddengna a panagayat ni Pablo? Narikna la ketdi ni Pablo a kaslattay nagunggon, a kasla ti maysa a barko iti sidong ti nadawel a bagyo. Anian a naglaka a simmuko la koman, a mariknana a barengbareng gayam amin dagiti napalabas a reggetna, wenno agpauyo! Aniat’ namagtalinaed ken Pablo? Aniat’ nanglapped kenkuana a di gunggonen ti pannakapaay?

Ti Ayat a Mamagkaykaysa Kadatayo

Imbati la ketdi ni Pablo iti panunot dagiti managbasana no nagtaudan agpadpada ti pigsa ken pakatignayanna. Insuratna: “Ti ayat nga adda ken Kristo pilitennakami.” (2 Corinto 5:14) Intudo ni Pablo ti kangrunaan a gubuayan ti pigsa ken pakatignayan. Ti mangpilit a puersa isu “ti ayat nga adda ken Kristo.” Kastoy ti kapaliiwan ti maysa nga iskolar ti Biblia maipapan itoy a kasuratan: “Saan a kunkunaen ni Pablo a ti ayattayo ken Kristo ti mamagtalinaed iti ministeriotayo . . . Daytat’ panagsardeng agingga laeng iti tengnga ti dalan nga agturong iti estasion. Ti ayattayo ken Kristo ti maparparayray ken kanayon a mataraonan babaen iti ayatna kadatayo.”—Kuami dagiti italiko.

Ti ayat nga impakita ni Kristo babaen ti panangipalubosna iti bagina nga aglasat iti nakaap-aprang nga ipapatay iti pagtutuokan a kayo—isu a naitedna ti perpekto a natauan a biagna kas subbot a mangispal iti amin a manamati a sangatauan—ti nangtignay, nangpilit, ken nanggutugot ken ni Pablo tapno itultuloyna ti agserbi iti interes ni Kristo ken iti panagkakabsat. Isu a ti ayat ni Kristo ti nangkontrol ken ni Pablo, a nanglapped kenkuana iti panagbalinna a managimbubukodan, ken nangipamaysa kadagiti kalatna iti panagserbi iti Dios ken iti padana a tao.

Talaga a ti ayat ni Kristo ti gubuayan ti pakatignayan ti maysa a Kristiano tapno agbiag a simamatalek. No maipasangotayo kadagiti pakasuotan a mabalin nga addaan iti mangpakapuy nga epekto kadatayo iti pisikal, emosional, ken naespirituan, ti mangpilit a puersa ti ayat ni Kristo ti tumulong kadatayo a makagteng iti labes ti kasasaad a pakaupayan ti maysa a nakapkapuy ti pakatignayanna. Mangted dayta kadatayo iti bileg nga agibtur.

Ditay makapagpannuray kadagiti imperpekto nga emosiontayo a mangtaginayon ken mangtignay kadatayo. Daytoy ket nangnangruna no dagiti pakasuotantayo ti maigapu iti pannakaupay wenno panagdanag. Iti kasumbangirna, ti ayat ni Kristo ti makabael a mamagtalinaed kadatayo iti ministeriotayo, a mangtaginayon ken mangtignay kadatayo, agpapan pay kadagiti personal a pakasuotantayo. Ti ayat ni Kristo ti tumulong iti Kristiano nga agibtur saan laeng nga iti labes dagiti namnamaen ti sabsabali no di pay ket nalabit uray iti labes dagiti bukodna a namnamaen.

Kasta met a tangay agpaut ti ayat ni Kristo, awan gibus ti epektona. Daytat’ mangpilit a puersa a saan nga agbaliwbaliw wenno agpukaw. “Ti ayat saan a pulos aggibus.” (1 Corinto 13:8) Tumulong dayta kadatayo a mangitultuloy iti simamatalek a panangsurottayo kenkuana, aniaman ti mabalin a mapasamak.

Dagiti pakasuotan ti emosion ti mangted iti puersa a mamagsisina kadatayo. Nagpateg ngarud a mennamennaentayo ti ayat nga impakita ni Kristo kadatayo. Ti ayat ni Kristo ti mamagkaykaysa kadatayo. Ti ayatna ti mamagbalin a posible a maliklikantayo ti pannakarba ti pammatitayo. (1 Timoteo 1:14-19) Kasta pay met a ti ayat ni Kristo ti mangpilit kadatayo a mangaramid iti amin a kabaelantayo a mangidayaw iti daydiay namagbalin a posible a maiparangarang ti ayat ni Kristo, ni Jehova a Dios.—Roma 5:6-8.