OSCE—Ania Dayta? Agballiginto Kadi?
Babaen ti koresponsal ti Agriingkayo! idiay Portugal
KALPASAN ti Gubat Sangalubongan II, rimsua ti panagsinnalisal iti pannakabalin iti nagbaetan ti Makinlaud a demokratiko a kapitalista a pagpagilian ken ti Makindaya a Komunista a Soviet a grupo dagiti nasion. Nangbuangay ti tunggal grupo dagiti nasion iti bukodna nga organisasion ti kinatalged: Ti North Atlantic Treaty Organization (NATO) iti Laud ken ti Warsaw Pact iti Daya.
Idi 1975 ti Cold War ti nangted iti umdas a gundaway tapno agpirma ti 35 nga Estado, agraman ti Estados Unidos ken Russia, iti naawagan a Helsinki Agreement. Nabuangay ti Conference on Security and Cooperation in Europe (CSCE). Daytat’ lugar a pagtutungtongan ken pagnunumuan ti adu a nasion a kameng ti dua a grupo dagiti nasion.
Iti Summit idiay Budapest idi 1994, ti CSCE binaliwanna ti naganna iti Organization for Security and Cooperation in Europe (OSCE). Ita, buklen dayta ti 54 a nakipaset nga Estado, agraman ti Estados Unidos, Canada, ken amin a pagilian ti dati a Soviet Union.
Ti Kalatna
Ti kalat dagiti nasion a kameng ti OSCE ket pasingkedan ti kinatalged ti Europa ken itandudo ti pannakaalagad dagiti kalintegan ti tao, panangkissay iti armas, demokratiko a wayawaya ken ti pannakarisut ti susik dagiti rehion.
Idi Disiembre 2-3, 1996, naangay idiay Lisbon, Portugal, ti maysa a summit meeting ti OSCE. Idi damo, naiturong ti atension iti NATO, tangay sumagmamano a kameng iti NATO, agraman ti Estados Unidos, ti pabor iti pannakapalawa ti NATO tapno mairaman ti ad-adu pay a nasion manipud Sentral ken Makindaya a Europa. Ngem imbes a suportaranda ti pannakapalawa ti NATO tapno mairaman ti dati a Makindaya a grupo dagiti nasion a kaaliado, kayat ti Russia ken sumagmamano kadagiti dati a Makindaya a grupo dagiti nasion a kaaliadona nga agbalin ti OSCE a lugar a pakatamingan ti bambanag maipapan iti kinatalged ti Europa.
Kinuna ti primero ministro ti Russia a ni Viktor Chernomyrdin, iti miting: “Anamonganmi ti pannakapapigsa ti OSCE, a dayta ti kakaisuna a lugar iti Europa a pakatamingan dagiti bambanag a sadiay amin nga Estado makapagtrabahoda a sangsangkamaysa. Dayta ti kasayaatan nga internasional a lugar a pagsasaritaan ti seguridad ken depensa.”
Ti naariwanas nga init iti malem ti kasla nangparnuay iti optimistiko a rikna ti kaaduan idi agngudon ti summit, agpapan pay kadagiti komento ti warnakan maipapan kadagiti nalidem a resultana. Aniaman ti mabalin a mapanunot a balligi wenno pannakapaay ti OSCE, makasigurado dagiti agay-ayat iti talna iti sadinoman a lugar nga addanton ti pudno a talna ken talged iti intero a daga babaen ti turay ti Pagarian ti Dios.—Salmo 72:1, 7, 8.
[Ladawan iti panid 31]
Ti Cultural Center ti Belém, idiay Lisbon, Portugal, a nakaangayan ti komperensia